काठमाडौं – देश गम्भीर संकट र विपद्को अवस्थामा रहेको भन्दै नेपाली कांग्रेसका विभिन्न नेताहरूले पार्टीभित्रको आन्तरिक विवाद अन्त्य गरी सम्पूर्ण एकताका साथ अघि बढ्न अपिल गरेका छन् । सभापति गगनकुमार थापाकै उपस्थितिमा शेरबहादुर देउवा पक्षका नेताहरू सहितका नेताहरू सम्मिलित ललितपुरमा बसेकाे बैठकले कांग्रेसलाई एक बनाएर लाने ढाेका खाेल्ने अभियान सुरू गरेकाे हाे ।
ADVERTISEMENT
‘पार्टीको सम्पूर्ण एकताका लागि अपिल’ शीर्षकमा जारी प्रेस विज्ञप्तिमा राजनीतिक अवस्था तरल र चुनौतीपूर्ण बन्दै गएको तथा सरकार र राजनीतिक दलहरूप्रति जनविश्वास कमजोर हुँदै गएको उल्लेख गरिएको छ । यस्तो अवस्थामा राजनीतिक प्रणाली र संस्थालाई बलियो बनाउन तथा देशको राष्ट्रियता, लोकतन्त्र र संविधानको संरक्षणका लागि प्रमुख राजनीतिक शक्तिहरू थप जिम्मेवार र एकताबद्ध हुनुपर्नेमा जोड दिइएको छ ।
ADVERTISEMENT
विज्ञप्तिमा नेपालको हरेक संकटमा नेपाली कांग्रेसले महत्वपूर्ण भूमिका निर्वाह गर्दै आएको उल्लेख गर्दै अहिले पार्टीभित्र देखिएको विवादले राष्ट्रिय राजनीतिमा सही दिशा दिन कठिनाइ उत्पन्न गरेको दाबी गरिएको छ। कांग्रेसभित्रको विवाद र विभाजनले राष्ट्र र लोकतन्त्रको हित नगर्ने भन्दै आन्तरिक मतभेदलाई संवाद र सहमतिबाट समाधान गर्न आग्रह गरिएको छ ।
नेपालको राजनीतिमा राष्ट्रिय तथा अन्तर्राष्ट्रिय शक्तिकेन्द्रको प्रभावसमेत संवेदनशील अवस्थामा रहेको उल्लेख गर्दै विज्ञप्तिमा राष्ट्रियता, लोकतन्त्र र संविधानलाई जोगाउँदै समृद्ध तथा सबल राष्ट्र निर्माण गर्न कांग्रेसको भूमिका अझ महत्वपूर्ण बनेको बताइएको छ ।
विज्ञप्तिमा पछिल्लो महाधिवेशनको संघारमा भएका विशेष महाधिवेशनलगायतका घटनाबाट पार्टीले धेरै अनुभव प्राप्त गरेको उल्लेख छ। ती अनुभवबाट पाठ सिक्दै विगतका विवाद र मतभेदलाई बोकेर बस्न नहुने तथा पार्टीलाई एक ढिक्का बनाएर अघि बढ्नुपर्नेमा जोड दिइएको छ ।
त्यसका लागि कांग्रेसको शीर्ष नेतृत्व पंक्तिले एक ठाउँमा बसेर गहन छलफल गरी साझा निष्कर्ष निकाल्नुपर्ने र व्यक्तिगत स्वार्थ, आग्रह तथा अहंकारभन्दा पार्टीको बृहत्तर हितलाई केन्द्रमा राख्नुपर्ने अपिल गरिएको छ। विज्ञप्तिमा विवादको तत्काल निकास खोज्न र संवादमार्फत समाधानमा पुग्न विशेष आग्रह गरिएको छ ।
त्यस्तै, आगामी १५औँ महाधिवेशनमा कांग्रेसका सबै सदस्य सहभागी हुन सक्ने वातावरण निर्माण गर्दै पार्टीको सबल नेतृत्व चयन र स्पष्ट राजनीतिक दिशा तय गर्नुपर्ने उल्लेख गरिएको छ।
पार्टी सभापति गगन थापाको भूमिकालाई समेत विशेष महत्वपूर्ण रहेको भन्दै वर्तमान परिस्थितिमा नेतृत्वले पार्टी एकताका लागि जिम्मेवार भूमिका निर्वाह गर्नुपर्ने संकेत गरिएको छ ।
विज्ञप्तिमा पार्टी सभापति निर्वाचनसँग सम्बन्धित दुवै पक्षबाट जारी गरिएका वक्तव्यलाई ध्यानमा राख्दै यथाशीघ्र पार्टीको सम्पूर्ण एकताका लागि निर्णायक वार्ता प्रारम्भ गर्न विशेष आग्रह गरिएको छ ।
अन्त्यमा देश संकटमा रहेको संवेदनशील घडीमा नेपाली कांग्रेसका सबै पक्षबीच संवाद, सहमति र सहकार्यका माध्यमबाट तत्काल विवाद समाधान गरी पार्टीलाई एक ढिक्का बनाउन र राष्ट्रिय चुनौतीहरूको सामना गर्न सक्ने सबल, एकताबद्ध र शक्तिशाली नेपाली कांग्रेस निर्माणमा जुट्न अपिल गरिएको छ ।
