धनगढी–प्रदेश ७ मा शान्ति, सुरक्षा कायम गराउन टोल–टोलमा प्रहरी अभियान शुरु भएको छ । अभियानको आज ७ नम्बर प्रदेशका आन्तरिक मामिला तथा कानुन मन्त्री प्रकाशबहादुर शाहले शुभारम्भ भएको घोषणा गरेका थिए ।
ADVERTISEMENT
अभियानको शुभारम्भ भएको घोषणा गर्दै ७ नम्बर प्रदेशका आन्तरिक मामिला तथा कानुन मन्त्री प्रकाशबहादुर शाहले राजनीतिक अस्थिरताका कारण नेपालमा शान्ति, सुरक्षा, अमन चयन खल्बलिएको अवस्थाको स्मरण गर्दै भने, ‘अब अस्थिरता हटेको छ ,जनतालाई शान्ति सुरक्षा प्रत्याभुत गराउनका लागि हामी लागिरहेका छौं ।’
ADVERTISEMENT
आगामी दिनमा कानुनको प्रभावकारी कार्यान्वयन हुने भन्दै उनले तस्करी, गुण्डागर्दी, चोरी, डकैती, जघन्य अपराधमा संलग्न जो कोहीलाई पनि कानुनको दायरामा ल्याउने बताए ।
प्रहरीले गोलीकाण्ड, चोरी, डकैती लगायतका अपराधमा संलग्न अपराधीलाई पक्राउ गर्न सफल भईसकेको स्मरण गर्दै उनले भने , ‘प्रहरीले यो अभियानबाट थप अनुसन्धानको दायरालाई फराकिलो पार्दै प्रदेशमा हुने अपराधलाई न्यूनिकरण गर्दै लाग्ने अपेक्षा लिएको छु ।’
धनगढी उपमहानगरपालिकाका नगर प्रमुख नृपबहादुर वडले समृद्धि र विकासका लागि शान्ति, सुरक्षा अपरिहार्य भएको बताए । उनले शान्ति सुरक्षालाई मजबुत बनाउन प्रहरीले ईमान्दार भएर लाग्नुपर्ने बताए ।
कैलाली प्रमुख जिल्ला अधिकारी ऋषीराम तिवारीले अपराधलाई न्यूनिकरण गर्न जनताको सहयोग आवश्यक रहेको बताए । उनले जनतालाई शान्ति, सुरक्षा अमन चयन प्राप्त गराउन प्रहरी सक्रिय भएर लाग्न समेत आग्रह गरे ।
संघीय प्रहरी ईकाइका वरिष्ठ प्रहरी उपरिक्षक हरिराज वाग्लेले समाजमा अपराध भएपनि प्रहरीलाई सूचना नहुँदा अनुसन्धानमा समस्या हुने गरेको बताए । समाजनै सूचनाका संवाहक हुन सूचना समाजबाटनै प्राप्त हुने भएकाले प्रहरीलाई काम गर्न यो अभियानले थप मद्दत पुर्याउने अपेक्षा व्यक्त गरे ।
अभियानको उद्देश्यबारे जानकारी दिंदै कैलाली प्रहरी प्रमुख विनोद घिमिरेले समाजमा शान्ति सुरक्षालाई बलियो बनाउन टोल–टोलमा प्रहरीको आवश्यकता रहेको बताए ।
