मकवानपुर – नेपाली कांग्रेस बागमती प्रदेश सभापति तथा पूर्व मुख्यमन्त्री इन्द्रबहादुर बानियाँ नेपाली कांग्रेसको १५औँ महाधिवेशनअन्तर्गत मकवानपुर क्षेत्र नं. १ बाट अत्यधिक मतसहित केन्द्रीय महाधिवेशन प्रतिनिधिमा विजयी भएका छन्।
क्षेत्रीय प्रतिनिधिहरूको विश्वाससहित महाधिवेशन प्रतिनिधिमा निर्वाचित बानियाँले प्राप्त मतलाई व्यक्तिगत उपलब्धिभन्दा पनि पार्टीप्रतिको कार्यकर्ताको विश्वास र जिम्मेवारीका रूपमा लिएका छन्।
लामो समयदेखि नेपाली कांग्रेसको राजनीतिमा सक्रिय बानियाँले राजनीति पद, प्रतिष्ठा वा व्यवसायका लागि नभई जनताको सेवाका लागि हुनुपर्ने धारणा अघि सार्दै आएका छन्। ‘राजनीति भनेको जनताको सेवा हो, व्यवसाय होइन’ भन्ने मान्यतालाई आफ्नो राजनीतिक यात्राको मूल आधार बनाउँदै आएका बानियाँले जनताको समृद्धिलाई नै देशको समृद्धिसँग जोडेर हेर्ने गरेका छन्।
उनको राजनीतिक दृष्टिकोणमा जनप्रतिनिधिको वास्तविक सफलता जनताको जीवनमा देखिने परिवर्तनसँग जोडिन्छ। जनता समृद्ध भए देश समृद्ध हुने र जनताको सेवा गर्ने जनप्रतिनिधिले पनि आफूलाई समृद्ध भएको अनुभूति गर्ने उनको धारणा छ।
बानियाँले आफू बाँचुन्जेल जनताको सेवामा समर्पित रहने बताउँदै आएका छन्। मकवानपुरबाट कांग्रेसको राजनीतिमा निरन्तर सक्रिय रहँदै आएका बानियाँ अहिले पार्टीको बागमती प्रदेश नेतृत्वमा छन्। प्रदेश सभापतिको जिम्मेवारीसँगै उनी पार्टी संगठन विस्तार, कार्यकर्तासँगको सम्बन्ध र जनताका सवाललाई राजनीतिको केन्द्रमा राख्ने विषयमा जोड दिँदै आएका छन्। कांग्रेसलाई उनले सबै वर्ग, समुदाय र पुस्तालाई समेट्ने पार्टीका रूपमा व्याख्या गर्दै आएका छन्। युवा, वृद्ध, महिला तथा विभिन्न समुदायका नागरिकलाई समेटेर अघि बढ्ने पार्टी कांग्रेस भएको उनको धारणा छ। मुलुक अप्ठ्यारो परिस्थितिमा पुग्दा त्यसबाट निकास खोज्ने जिम्मेवारी कांग्रेसले लिनुपर्ने उनको विश्वास छ।
१५औँ महाधिवेशनको प्रक्रियामा मकवानपुर–१ बाट अत्यधिक मतसहित महाधिवेशन प्रतिनिधिमा बानियाँको विजयलाई उनको संगठनात्मक प्रभाव र कार्यकर्तासँगको निरन्तर सम्बन्धसँग जोडेर हेरिएको छ।
महाधिवेशन प्रतिनिधिका रूपमा प्राप्त नयाँ जिम्मेवारीसँगै बानियाँ अब कांग्रेसको १५औँ केन्द्रीय महाधिवेशनमा सहभागी हुँदैछन्। जनताको सेवा, पार्टी संगठनको सुदृढीकरण र कांग्रेसलाई सबै पुस्ताको साझा राजनीतिक घरका रूपमा अघि बढाउने प्रतिबद्धतालाई उनले आफ्नो राजनीतिक यात्राको आधार बनाउँदै आएका छन्।
