मलेसियामा सागरको उत्कृष्ट प्रदर्शन, बनाए अर्को शतक

काठमाडौँ– मलेसियन प्रिमियर लिग एकदिवसीय क्रिकेट प्रतियोगिता अन्तर्गतको खेलमा सागर पुनले अर्को शतक प्रहार गरेका छन्।

मलेसियामा जारी प्रतियोगिता अन्तर्गत शुक्रबार क्वालालाम्पुर र सेलाङ्गोरबीच भएको पहिलो सेमिफाइनलमा सागरले क्वालालाम्पुरका लागि शतकीय पारी खेलेका हुन्। उनले ११८ बल खेल्दै ९ चौकाको सहयोगमा १०० रन बनाएका छन्। उनको शतकीय योगदानले क्वालालाम्पुरले निर्धारित ५० ओभरमा ३०५ रनको योगफल तयार पारेको थियो।

क्वालालम्पुरको टोलीबाटै खेलेका अर्का नेपाली विकेट किपर ब्याट्सम्यान आशिफ शेखले नटआउट २० रन बनाए। ११ बल खेलेका शेखले ३ चौकासहित २० रन बनाएका हुन्।

आजको खेलसँगै ९ खेलबाट सागरले २ सतक र १ अर्धसतकसहित ४४२ रन बनाएर सर्वाधिक रन बनाउने खेलाडीका रूपमा अगाडि छन्। यस्तै उनले प्रतियोगितामा ९ विकेट समेत लिएका छन् ।