यु-१९ एकदिवसीय सिरिज : नेपालसंग एशियन च्याम्पियन अफगानिस्तान २५ रनले पराजित

काठमाडौँ– भारतमा जारी चौकाणात्मक एकदिवसीय यु–१९ सिरिजमा नेपालले पहिलो जित हात पारेको छ । नेपाली युवा टोलीलले एशियन च्याम्पियन अफगानिस्तानलाई रनले पराजित गरेको हो ।

भारतको लखनउस्थित एकना अन्तराष्ट्रिय मैदान ‘बी’मा टस हारेर पहिले ब्याटिङ थालेको नेपाल यू-१९ले ४९.३ ओभरमा सबै विकेट गुमाउँदै १८९ रन बनाउन सक्यो । जवाफी ब्याटिङमा उत्रिएको अफगानिस्तान ४७.४ ओभरमा सबै विकेट गुमाउँदै १६४ रनमै समेटियो । अफगानिस्तानका लागि कप्तान इजाज अहमेद मेहरानले सर्वाधिक ५७ रन बनाए । २ चौका र २ छक्का ठोकेका उनले आफ्नो टिलीलाई जित दिलाउन सकेनन् ।

यस्तै रियाज हसन ३८, अब्दुल रहमान रहमानीले ३ छक्का र २ चौकाको मदतमा ३७ रन बनाए । आरिफ खानले १० रन बनाउँदा अन्यले दोहोरो अंक छुन सकेनन् ।
नेपालका लागि सागर ढकालले उत्कृष्ट बलिङ गरे । १० ओभरमा ३ मेडेन राख्दै २९ रन मात्र खर्चिएर ४ विकेट लिए । यस्तै कमलसिंह ऐरी र राशिद खानका नाममा समान २२ विकेट रह्यो । यस्तै पवन सरार्फले एक विकेट लिए ।

यता नेपालका पवन सर्राफले उत्कृष्ट ब्याटिङ गरे । अर्धशतक प्रहार गर्ने क्रममा उनले ९६ बल खेली १० चौका र एक छक्काको मदतमा नटआउट ७८ रन बनाए ।

यस्तै सन्दीप जोराले २८ रन बनाउँदा राशिद खानले नवौँ नम्बरमा आएर नेपाली इनिङलाई माथि उकास्ने प्रहास गरे । २ चौकाको मदतमा व्यक्तिगत २४ रन बनाएका राशिदले पवन सर्राफसंग मिलेर ६५ रनको साझेदारी गरे । यस्तै लोकेश बमले १६ रन बनाउँदा भीम सार्की १३ रनमा आउट भए । यस्तै कमलसिंह ऐरीले ९ तथा त्रितराज दास ४ रनमा आउट भए ।

नेपालका लागि कप्तान आशिफ सेखले आज पनि कप्तानी इनिङ सम्हाल्न सकेनन् । उनी १२ बल खेली ३ रनमै पेवेलियन फर्किए । यस्तै अरुण ऐरी र सागर ढकालले खाता नै खोल्न सकेनन् भने किशोर महतो १ रन बनाएर फर्किए ।

यता अफगानिस्तानका लागि नाविद मोहम्मद कवीरले ३ तथा अविद मोहम्मदी र आरिफ खान दौलत्जाइले समान २/२ विकेट लिए । यस्तै उस्मान घानी र समिउल्लाह जवादले समान १/१ विकेट हात पारे ।

नेपालले यस प्रतियोगितालाई आगामी २९ तारिखदेखि बंगलादेशमा हुने एशिया कपको तयारीमा लिएको छ ।