मापसे गरेर सवारी चलाउनेलाई सचेतना परीक्षा लिइने, फेल भए लाइसेन्स फिर्ता नपाउने

मोरङ– दण्ड जरिवाना गरेर भन्दा सचेतना जगाएर मादक पदार्थ सेवन गरी सवारीसाधन चलाउने प्रवृत्ति नियन्त्रण गर्ने प्रयास मोरङ प्रहरीले थालेको छ । मोरङमा बढ्दै गएको सवारी दुर्घटना न्यून गर्न र मापसे गरेर सवारी चलाउदा हुने क्षति बारे जानकारी दिन जिल्ला प्रहरी कार्यालय मोरङले मापसे गरेर सवारी चलाउदा पक्राउ परेकाहरुलाई सचेतना परीक्षा लिन शुरु गरेको हो ।

सचेतना परीक्षामा ट्राफिक नियम, कानुनी प्रावधान र व्यवहारिक कुराहरु गरी ८० वटा प्रश्नहरु सोध्ने गरिएको छ । मादक पदार्थ सेवन गरी सवारी साधन चलाउदा पक्राउ परेकाहरुले सचेतना परीक्षा दिनुपर्ने र परीक्षामा उत्तिर्ण नभए सम्म लाइसेन्स फिर्ता नपाउने नियम मोरङमा थालिएको हो । सचेतना परीक्षामा पास हुन ८० प्रतिशत अर्थात ६४ अंक ल्याउने पर्ने भएकाले लाइसेन्स सवारीचालकहरुले तीन पटक सम्म परीक्षा दिएर पास हुने गरेका छन् ।

मापसे नियन्त्रण अभियानका लागि शुरु गरिएको यो कार्यक्रमलाई सडक सुशासन कार्यक्रमसंग जोड्न लागिएको र ट्राफिक नियम उल्लंघन गर्नेले पनि अनिवार्य सचेतना परीक्षा दिनैपर्ने तयारी गरिएको मोरङका प्रहरी उपरीक्षक मनोज केसीले जानकारी दिएका छन् । मोरङ प्रहरीले शुरु गरेको ट्राफिक सचेतना परीक्षामा दैनिक ८० जनाले परीक्षा दिने गरिरहेका छन् ।