काठमाडौं । म्यानचेस्टर सिटी इंग्लिस प्रिमियर लिग फुटबलमा दोस्रो स्थानमा उक्लिएको छ । लिग अन्तर्गत आइतबार राति भएको खेलमा सिटीले साउथह्याम्टनलाई ३–१ ले पराजित गर्दै दोस्रो स्थानमा उक्लन सफल भएको हो ।


ADVERTISEMENT


जितपछि सिटीले टोटेनहमलाई पछि पार्दै दोस्रो स्थानमा उक्लिएको हो । सिटीको २० खेलबाट ४७ अंक पुगेको छ । तेस्रो स्थानको टोटेनहमको ४५ अंक रहेको छ । शीर्ष स्थानको लिभरपुलको समान खेलबाटै ५४ अंक रहेको छ ।


ADVERTISEMENT

# # #


सिटीले साउथह्याम्टनलाई उसकै मैदानमा पराजित गरेको हो । सिटीको जितमा डेभिड सिल्भा र सर्जियो अग्विरोले गोल गरे । एक गोल उपहार पाएको थियो । साउथह्याम्टनका पिएरे इमिलले एक गोल फर्काए ।

बर्नाडो सिल्भाको पासमा डेभिड सिल्भाले गोल गरेपछि सिटीले खेलको १०औं मिनेटमा अग्रता बनाएको थियो । ३७औं मिनेटमा पिएर इमिलले गोल गर्दै खेललाई १–१ गोलको बराबरीमा ल्याएका थिए ।

४५औं मिनेटमा जेम्स वार्ड प्रोजले आत्मघाती गोल गरेपछि सिटीले खेलमा २–१ को अग्रता बनाएको थियो । पहिलो हाफको इन्ज्युरी समयको थप गरिएको तेस्रो मिनेटमा अग्विरोले गोल गरेपछि सिटीले खेलमा ३–१ को अग्रता बनाएको थियो ।

घरेलु टोली खेल सकिन ५ मिनेट बाँकी रहँदा १० खेलाडीमा समेटिएको थियो । फर्नाडिन्होमाथि गम्भीर फल गरेपछि रेफ्रीले पिएरे इमिललाई सोझै रातो कार्ड देखाउदै मैदान बाहिर पठाएका थिए ।

त्यसपछि थप गोल निस्कन नसक्दा सिटी ३–१ ले विजयी हुन सफल भयो । जितसँगै सिटीले शीर्ष स्थानमा रहेको लिभरपुलसँगको अंक दुरी ७ मा झारेको छ ।