पोखरा– नेपाली काँग्रेसका वरिष्ठ नेता रामचन्द्र पौडेलले सङ्घ र प्रदेशको आसन्न निर्वाचनका लागि एकताबद्ध भएर क्रियाशील बन्न पार्टीका नेता तथा कार्यकर्तालाई निर्देशन दिएका छन् ।

नेपाली काँग्रेसका अगुवा कार्यकर्तासँग शनिबार आयोजित छलफल एवं अन्तरक्रियामा उनले राष्ट्र र लोकतन्त्रको रक्षाका लागि आसन्न प्रदेश र सङ्घको निर्वाचनमा काँग्रेसले जित्नु आवश्यक भएको बताए ।


ADVERTISEMENT

# # #


नेकपा (एमाले)को सर्वसत्तावादी चरित्र लोकतन्त्रका लागि घातक हुने बताउँदै उनले लोकतन्त्र खतरामा पर्नुले राष्ट्र नै खतरामा पर्ने जिकिर गरे । पार्टीमा धेरै संकट देखिएको बताउँदै उनले प्रत्येक नेता तथा कार्यकर्तामा मैलेभन्दा पनि पार्टीले जित्नुपर्छ भन्ने भावनाको विकास हुनुपर्ने उल्लेख गरे ।

सामाजिक विकासका साथै जनसरोकारका विषयलाई बोकेर आमजनताको भावनालाई जित्नका लागि क्रियाशील बन्न उनले आग्रह गरे।

कार्यक्रममा नेपाली काँग्रेस कास्कीका सभापति कृष्ण केसी, जिल्लाका पूर्व सभापति सोभियतबहादुर अधिकारी, अन्नपूर्ण गाउँपालिकाका प्रमुख युवराज कुँवर, देवराज चालिसे, गंगाधर पराजुली, शिरोमणि बराल, लक्ष्मी पाण्डे, माया बराल, नीलकण्ठ शर्मालगायतले स्थानीय तहको निर्वाचनमा भोगेको पराजयलाई आत्मसात् गरी आसन्न निर्वाचनमा पार्टीलाई विजयी बनाउन सबै आ–आफ्ना ठाउँबाट जुट्नुपर्नेमा जोड दिए। रासस

प्रतिकृया

प्रतिकृया