काठमाडौं – अटोमोबाइल क्षेत्रको कुम्भ मेलाको रुपमा प्रत्येक वर्ष हुँदै आइरहेको नाडा अटो शो स्थगित भएको छ । नाडा अटोमोबाइल एशोसिएसन अफ नेपालले प्रत्येक वर्ष दशैं अगाडि प्राय भदौमा आयोजना गर्ने अटो शो कोरोना संक्रमणका कारण स्थगित गर्ने निर्णय गरेको हो ।
कोरोना संक्रमण फैंलिदै गएपछि सरकारले गरेको बन्दाबन्दीपछि चैतयता अटोमोबाइल व्यवसाय धरासयी छ । सवारी विक्रेता कम्पनीले बन्दाबन्दीपछि विभिन्न स्कीम र छूटसहित सवारी विक्री शुरु गरेकोमा संक्रमण बढ्दै गएपछि व्यवसाय पुनः ऋणात्मक हुँदै गएको नाडाका अध्यक्ष कृष्ण प्रसाद दुलालले बताए । व्यवसायीहरुकाअनुसार गत वर्ष सरकारले अटोमोबाइलको खरीद र आपूर्तिमा कडाइ गरेपछि त्यसयता व्यवसाय धरासयी छ । बन्दाबन्दी सकिएपछि नाडा अटो शोले धरासयी व्यवसायलाई केही राहत दिने अपेक्षा व्यवसायीको भएपनि संक्रमण फैलिएपछि अटो शो स्थगित गर्नुपरेको दुलालले बताए । उनी भन्छन्, ‘धरासयी व्यवसायलाई अटो शोले केही राहत दिने आशा गरिएपनि अब सटर बन्द गरेर पलायन हुनुपर्ने अवस्थामा व्यवसायी पुगेका छन् ।’
अटोमोबाइलको नेपालमा सबैभन्दा बढी कारोवार दशैं अगाडि हुने गरेको छ । प्रायले नाडामा सवारी बुक गरेर दशैंसम्म खरीद गर्ने गरेका छन् । प्रदर्शनीमा गत वर्ष ५ अर्बको आर्थिक कारोवार भएकोमा यस वर्ष त्योभन्दा बढी कारोवार गर्ने लक्ष्य नाडाको थियो । अटोमोबाइल क्षेत्रको उक्त आम्दानी यस वर्ष कोरोना संक्रमणका कारण गुम्न पुगेको छ । कोरोना बढ्दैका कारण हाललाई अटो शो स्थगित गरेपनि अवस्था सामान्य भएमा फागुनमा अटो शो गर्ने तयारी गरिरहेको दुलालले बताए ।