एसपीपी सम्झौता ओलीको पालामा भएको प्रचण्डको दाबी, भने– ‘राष्ट्रवादको पाखण्डी प्रचार हुँदैछ’

काठमाडौँ– नेकपा माओवादी केन्द्रका अध्यक्ष पुष्पकमल दाहाल (प्रचण्ड) ले स्टेट पार्टनरसिप प्रोग्राम (एसपीपी) कार्यान्वयनको सम्झौता तत्कालिन ओली सरकारकै पालामा भएको दाबी गरेका छन् ।

रितबहादुर खड्का स्मृति दिवसका अवसरमा बिहीबार पार्टी कार्यालय, पेरिसडाँडामा आयोजित कार्यक्रममा प्रचण्डले एसपीपी सम्झौता भइनसकेको र यो कुनै पनि हालतमा नहुने स्पष्ट पारेका छन् ।

कार्यक्रममा बोल्दै उनले राष्ट्रवादको पाखण्डी प्रचार गर्ने प्रत्यत्न भइरहेको बताए । ‘अहिले राष्ट्रवादको झुटो र पाखण्डी प्रचार हुँदैछ । हिजो जसले आत्मसमर्पण गरेर आज उनीहरु नै एसपीपी हुँदैछ रे भनेर भइनै सक्यो जसरी प्रचार गर्दैछन्, त्यो बिल्कुल झुटो हो । गठबन्धनमा भएको छलफलमा त्यस्तो कुनै सम्झौता भाएको छैन र हुँदैन भनेर प्रधानमन्त्रीले भन्नुभएको छ ।’ उनले भने ।

अघि बोल्दै उनले थपे, ‘बरु यो एसपीपी सम्झौता कार्यान्वयन गर्ने काम २०१९ सालमा केपी ओली नेतृत्वको सरकारले सम्झौता गरिसकेको तथ्य इतिहासमा छ । यो हामी सबैले बुझ्न जरुरी छ ।’