गृहमन्त्रीले ‘समाचार लुकाउन’ आग्रह गरेको सम्भव सिरोहियाको दाबी, भने–‘प्रयास असफल भएपछि बुवालाई एरेस्ट गरे’

काठमाडौँ– कान्तिपुर मिडिया ग्रुपका प्रबन्ध निर्देशक सम्भव स्वाँर सिरोहियाले गृहमन्त्री रवि लामिछानेमाथि कान्तिपुर दैनिकमा आफू विरुद्धको समाचार रोक्न आग्रह गरेको आरोप लगाएका छन् ।

शुक्रवार ७ मिनेट लामो भिडियो सार्वजनिक गर्दै सिरोहियाले गृहमन्त्रीको प्रयास असफल भएको दाबी गरेका हुन् । भिडियोमा उनले कान्तिपुरले समाचार रोक्न नमानेपछि मिडिया ग्रुपका सीईओ कैलाश सिरोहियालाई पक्राउ गरिएको बताएका छन् ।

गृहमन्त्रीको सहकारी काण्ड लुकाउन कान्तिपुरले इन्कार गरेको बताउँदै उनले भनेका छन्, ‘कान्तिपुरमा सम्पादकीय स्वतन्त्रता छ । उहाँले यो कुरा बुझ्न सक्दै सक्नुभएन । गृहमन्त्रीको अनुरोधमा कान्तिपुरले सेटिङ नगरेको भएर उहाँ फेरि तल्लो स्तरमा ओर्लिनुभयो र आफ्नो पद दुरुपयोग गरेर मेरो बुवालाई एरेस्ट गर्नुभयो ।’

साथै उनले कैलाशविरुद्व उजुरी गर्ने व्यक्ति रास्वपाकै कार्यकर्ता रहेको र सो व्यक्तिले सिरोहियाको नागरिकता प्रतिलिपी कसरी पाए ? भन्ने प्रश्न समेत उठान गरेका छन् ।

कैलाश सिरोहिया नागरिकतामा किर्ते अभियोगमा जेठ ८ गते पक्राउ परेका थिए । ९ दिन हिरासतमा बसेपछि उनी गत १६ जेठमा हाजिर जमानीमा छुटेका थिए । त्यसको ८ दिनपछि कैलाशका छोरासमेत रहेका सम्भवले मुख खोलेका हुन् ।