इतिहास बोकेको संस्कृतिहरुलाई सबै मिलेर प्रवद्र्धन गर्नुपर्छ : प्रधानमन्त्री ओली

काठमाडौँ– प्रधानमन्त्री केपी शर्मा ओलीले सबै मिलेर मुलुकका बिभिन्न कला संस्कृतिको संरक्षण र प्रवद्र्धन गर्नुपर्नेमा जोड दिएका छन् ।

बुधबार बालुवाटारमा २१ औँ राष्ट्रिय ज्यापु दिवसका लागि परम्परागत निमन्त्रणा पत्र ग्रहण गर्दै प्रधानमन्त्री ओलीले मौलिक, उन्नत र परिस्कृत तथा इतिहास बोकेको संस्कृतिहरुलाई सबै मिलेर प्रवद्र्धन गर्नुपर्नेमा जोड दिएका हुन् ।

नेवारी संस्कृति नेपाली संस्कृतिको पहिचान दिने इतिहास भएको उनले बताए । प्रधानमन्त्री ओलीले ज्यापु गुठीका लागि अक्षयकोषमा सक्दो रकमवृद्धि गर्न सरकारले सहयोग गर्ने विश्वास दिलाए ।

सङ्घीय सांसद कृृष्णगोपाल श्रेष्ठ, ज्यापु संस्कृति विकास कोषका अध्यक्ष मङ्गलकृष्ण महर्जनसहित करिब सय जनाको समूहले नेवारी बाजागाजा प्रस्तुत गर्दै सगुन दिएर दिवसको प्रमुख अतिथिका रुपमा प्रधानमन्त्री ओलीलाई निमन्त्रणा गरेको थियो ।

यस वर्षको ज्यापु दिवस तथा योमरी पुन्ही यही मङ्सिर ३० गते मनाइनेछ । उक्त दिन काठमाडौँम र्यालीसहित वसन्तपुरमा मुख्य कार्यक्रम बताइएको छ ।