सार्क सम्मेलनबारे आरजुलाई जयशंकरको प्रश्न : ‘तिम्रो देशमा आएर मान्छे मारेको भए बैठक हुन्थ्यो ?’

काठमाडौँ– परराष्ट्रमन्त्री डा. आरजु राणा देउवाले सार्क सम्मेलन दक्षिण एसियाली क्षेत्रीय सहयोग संगठन (सार्क) को बैठक राख्न नेपालको तर्फबाट प्रयास जारी रहेको बताएकी छन् ।

सोमबार प्रतिनिधिसभाको अन्तर्राष्ट्रिय सम्बन्ध समितिमा भारतले सार्क बैठक राख्न नचाहेको तथ्य सार्वजनिक गर्दै मन्त्री राणाले सांसदहरूको प्रश्नको जवाफ दिने क्रममा सार्क बैठक राख्न निरन्तर पहल गरेपनि भारत-पाकिस्तान तनावका कारण सम्भव नभएको बताएकी हुन् ।

यसबारे गत सेप्टेम्बरमा भारत भ्रमणका क्रममा नेपालका तर्फबाट आफूले सार्क सम्मेलनको विषयमा कुरा उठाएको उनको दाबी छ । ‘यहि सेप्टेम्बरमा मैले भारत जाँदा सार्कको विषय उठाएको थिएँ तर उता जयशंकरजीले तिम्रो देशमा आएर मान्छे मारेको भए मिटिङ हुन्थ्यो ? भनेर प्रश्न गरेपछि मैले जवाफ दिन सक्ने अवस्था रहेन’, उनले भनिन् ।

तथापि नेपालले सार्कलाई चलायन बनाउनका लागि आवश्यक काम गरिरहेको परराष्ट्रमन्त्री राणाको भनाई छ ।