सुनसरी- सुनसरीको देवानगञ्ज गाउँपालिका–३, कप्तानगञ्जमा भएको घटनाका क्रममा प्रहरीको गोली लागेर मृत्यु भएका दुई युवाको शव पोस्टमार्टमपछि आफन्तले बुझेका छन्। सरकार र पीडित परिवारबीच सातबुँदे सहमति भएपछि धरानस्थित बीपी कोइराला स्वास्थ्य विज्ञान प्रतिष्ठानमा राखिएको शव उठाउने प्रक्रिया अघि बढाइएको हो।
ADVERTISEMENT
घटनापछि पीडित परिवारले निष्पक्ष छानबिन, दोषीमाथि कानुनी कारबाही, राहत तथा मृतकलाई सहिद घोषणा गर्नुपर्ने माग राख्दै शव बुझ्न अस्वीकार गरेका थिए। त्यसपछि गृह प्रशासन, स्थानीय प्रशासन, सुरक्षा निकाय र पीडित पक्षबीच पटक–पटक भएको वार्तापछि सातबुँदे सहमति जुटेको हो। सहमतिपछि पोस्टमार्टम प्रक्रिया सम्पन्न गरी शव परिवारको जिम्मा लगाइएको छ।
ADVERTISEMENT
पोस्टमार्टम सकिएलगत्तै मृतकका आफन्तले शवलाई अन्तिम संस्कारका लागि देवानगञ्ज गाउँपालिका–३, कप्तानगञ्जस्थित आफ्नै गाउँ लगेका छन्। स्थानीय परम्पराअनुसार आजै अन्त्येष्टि गरिने तयारी गरिएको छ। अन्तिम श्रद्धाञ्जलीका लागि स्थानीयवासी, आफन्त तथा विभिन्न राजनीतिक दलका प्रतिनिधिहरू पनि गाउँमा पुगिरहेका छन्।
सहमतिअनुसार घटनाको सत्यतथ्य छानबिन गर्न उच्चस्तरीय समिति गठन गर्ने, घटनामा संलग्न दोषीमाथि कानुनबमोजिम कारबाही प्रक्रिया अघि बढाउने, पीडित परिवारलाई राहत तथा क्षतिपूर्ति उपलब्ध गराउने, घाइतेहरूको निःशुल्क उपचारको व्यवस्था गर्ने र मृतकलाई सहिद घोषणा गर्न आवश्यक कानुनी प्रक्रिया अघि बढाउनेलगायत विषय समेटिएका छन्।
देवानगञ्जमा भएको घटनापछि सुनसरीसहित मधेश प्रदेशका केही जिल्लामा तनाव उत्पन्न भएको थियो। विरोध प्रदर्शन, बन्द, कर्फ्यु र सुरक्षा सतर्कता बढाइएपछि जनजीवन केही दिन प्रभावित बनेको थियो। पछिल्ला दिनमा सरकार र विभिन्न सरोकारवालाबीच संवाद बढेसँगै अवस्था क्रमशः सामान्य बन्दै गएको प्रशासनले जनाएको छ।
यसैबीच, स्थानीय प्रशासनले अन्त्येष्टि कार्यक्रम शान्तिपूर्ण रूपमा सम्पन्न गराउन आवश्यक सुरक्षा व्यवस्था मिलाइएको जनाएको छ। सम्भावित अप्रिय घटना हुन नदिन नेपाल प्रहरी, सशस्त्र प्रहरी बल र अन्य सुरक्षा निकायलाई परिचालन गरिएको छ।
प्रशासनले नागरिकलाई संयमित रहन, सामाजिक सञ्जालमा फैलिने अपुष्ट तथा भ्रामक सूचनाको पछि नलाग्न र सामाजिक सद्भाव कायम राख्न सहयोग गर्न अपिल गरेको छ। सरकारले पनि घटनाको निष्पक्ष अनुसन्धान, पीडितलाई न्याय र शान्ति–सुरक्षा कायम गर्ने प्रतिबद्धता दोहोर्याएको छ।
