सहकारी पिडितद्वारा राष्ट्रपति भवन नजिक धर्ना (तस्बिरमा)

काठमाडौँ– सहकारी, लघुवित्त एवं मिटरव्याज पिडितहरुले राष्ट्रपति भवन नजिक धर्ना दिएका छन् ।

सरकारसँग भएको सहमति कार्यान्वयन नभएपछि सहकारी तथा बित्तीय समस्या समाधान संयुक्त राष्ट्रिय अभियान(महासंघ)को अनुवाइमा उनीहरूले सोमबार काठमाडौंको शान्तिबाटीकाबाट र्यालीसहित राष्ट्रपति भवन नजिक पुगेर धर्ना दिएका हुन् ।

राष्ट्रपति भवन अगाडी नै धर्ना दिन खोजेपनि उनीहरुलाई प्रहरीले निषेधित क्षेत्रमा नै रोकेको थियो । प्रदर्शनकारीहरुले ‘सहकारीको स्वनियमन खारेज गर, पीडितको बचत रकम फिर्ता हुने सुनिश्चित गर, पीडितको घाउमा मलम लगाउने काम गर’ लगाएतका प्लेकार्ड प्रदर्शन गरेको थिए भने पीडितलाई न्याय दे भन्दै उनीहरुले नारावाजी गरेका थिए ।

सरकारले पटकपटक सम्झौता गर्ने तर पीडितको समस्या समाधान नगर्ने गरेको उनीहरुको गुनासो छ । उनीहरुले लघुवित्त संस्था खारेज गर्नुपर्ने, सामूहिक ऋण मिनाहा गर्नुपर्ने, मिटरब्याजी तमसुक रद्द गर्नुपर्नेसहितका माग राख्दै काठमाडौं केन्द्रीत आन्दोलन गर्दै आएका छन् ।