एन आई सी एशिया लघुवित्तको सञ्चालकमा बलराम पौडेल नियुक्त

काठमाडौँ– एन आई सी एशिया लघुवित्त वित्तीय संस्था लिमिटेडको सञ्चालकमा बलराम पौडेल नियुक्त भएका छन् ।

आइतबार सम्पन्न २३८औँ सञ्चालक समितिको बैठकले सर्वसाधारण समूहतर्फबाट प्रतिनिधित्व गर्ने सञ्चालक पदमा पौडेललाई नियुक्त गरेको हो । उनको कार्यकाल आगामी वार्षिक साधारण सभासम्मका लागि कायम रहनेछ।

पौडेलको बैंकिङ्ग तथा लघुवित्त क्षेत्रमा करिब ३९ वर्षको अनुभव छ। उनले नेपाल सरकारको उद्योग, वाणिज्य तथा आपूर्ति मन्त्रालयद्वारा सञ्चालित “ग्रामीण उद्यम तथा रेमिट्यान्स परियोजना”मा प्रशिक्षण विशेषज्ञका रूपमा कार्य गरेका थिए ।

साथै, उनी तत्कालीन सिभिल लघुवित्तका प्रमुख कार्यकारी अधिकृत, कृषि विकास बैंक, तथा साना किसान विकास बैंकजस्ता संस्थामा समेत महत्वपूर्ण जिम्मेवारीमा रहेका छन् ।

शिक्षाको पृष्ठभूमिमा, पौडेलले समाजशास्त्रमा स्नातकोत्तर र अर्थशास्त्रमा स्नातक उपाधि हासिल गरेका छन् ।

संस्थाका अनुसार, नव नियुक्त सञ्चालकको व्यापक अनुभव र ज्ञानले संस्था आफ्नो लक्ष्य हासिल गर्न तथा समग्र लघुवित्त क्षेत्रभित्र अझ सशक्त, अग्रणी र प्रभावशाली संस्था बन्ने दिशामा थप टेवा पुग्ने विश्वास लिइएको छ।