बागमती प्रदेशमा मुख्यमन्त्री बन्दै इन्द्र बहादुर बानियाँ

काठमाडौँ– नेपाली कांग्रेसका वरिष्ठ नेता तथा बागमती कांग्रेसका सभापति इन्द्र बानियाँ बागमती प्रदेशको नयाँ मुख्यमन्त्री बन्ने लगभग निश्चित जस्तै देखिएको छ। नेपाली कांग्रेस संसदीय दलको नेतामा निर्वाचित भएसँगै बानियाँ अब सत्ता नेतृत्वमा उक्लिन लागेका हुन्।

बानियाँले संसदीय दलको नेतामा चयन भएसँगै दिएको पहिलो सार्वजनिक अभिव्यक्तिमा वर्तमान मुख्यमन्त्री बहादुर सिंह लामालाई नैतिक जिम्मेवारी बहन गर्दै राजीनामा दिन आग्रह गरेका थिए । सोही अनुरुप लामाले पनि परिस्थिति बुझेको देखिएको छ। पार्टी सभापति शेरबहादुर देउवाको निर्देशनपछि लामा राजीनामाको तयारीमा छन् भने उनी आफ्ना नजिकका सांसदहरूसँग परामर्शमा व्यस्त छन्।

वि.सं. २०४४ सालदेखि राजनीतिमा सक्रिय बानियाँ मकवानपुरमा कम्युनिष्टको गढ तोड्दै संविधानसभा सदस्य बनेका थिए। उनले विगतमा संस्कृति, पर्यटन तथा गृह मन्त्रालयमा राज्यमन्त्रीको जिम्मेवारीसमेत सम्हालेका थिए। सामाजिक र राजनीतिक क्षेत्र दुवैमा सक्रिय रहेका बानियाँ अहिले बागमती प्रदेशको सशक्त नेतृत्वका लागि कांग्रेसभित्र सर्वसम्मत नेतृत्वको रूपमा स्थापित हुँदै छन्।

बागमती प्रदेशमा लामो समयदेखि देखिएको राजनीतिक अस्थिरता, कार्यक्षमता अभाव, र आन्तरिक असन्तुलनलाई समाधान गर्ने नेतृत्वको आवश्यकता थियो। बानियाँको सम्भावित नेतृत्वले अब सरकारलाई स्थायित्व, पारदर्शिता र जवाफदेहितातर्फ उन्मुख गराउने जनअपेक्षा रहेको छ। कांग्रेसको एकमत र जनस्तरको समर्थनले बानियाँमाथि प्रदेश राजनीतिमा परिणाममुखी सुधार ल्याउने पनि जिम्मेवारी थपिएको छ।