निर्वाचनको तयारीसंगै देशमा अन्यौलता हट्यो : प्रचण्ड

काठमाडौँ – नेपाली कम्युनिष्ट पार्टी(नेकपा)का संयोजक पुष्पकमल दाहाल प्रचण्डले निर्वाचनको तयारीसंगै देशमा अन्यौलता हटेको बताएका छन् ।

नेपाल उद्योग वाणिज्य महासंघले बुधबार काठमाडौंमा आयोजना गरेको शान्ति, स्थायित्व र समृद्धिका लागि सहकार्य विषयक सर्वपक्षीय राष्ट्रिय संवादमा प्रचण्डले जेनजी आन्दोलनपछि देखिएको अन्यौलता निर्वाचनको तयारीसंग हटेर गएको बताएका हुन् । उनले धेरै अप्ठेरो र जटिलताकाबीच निर्वाचन नै देशको निकास हो भनेर सरकारले गरेको दृढ प्रदर्शन प्रसंशनीय रहेको धारणा राखे ।

अहिले सबै राजनीतिक दल र आम जनताले निर्वाचनको मानसिकता बनाइएकोले कुनै अन्यौलता नरहेको उनको भनाइ छ । प्रचण्डले ताजा जनादेशमार्फतको संसदबाट जेनजीका मुद्दालगायत संविधानका सीमा र कमीहरुलाई संशोधनमार्फत सुधार गर्नुपर्नेमा जोड दिए ।

त्यस्तै प्रचण्डले निजी क्षेत्रलाई संरक्षण, प्रोत्साहन र लगानीको वातावरण बनाउन नसके मुलुक विकास र समृद्धितर्फ अघि बढ्न नसक्ने बताए ।