हेटौंडा – स्थानीय तह निर्वाचन २०७४ र २०७९ मा नेकपा (माओवादी केन्द्र)का तर्फबाट भिमफेदी गाउँपालिका–९ बाट उम्मेदवार बनेका दीपक गोले आज नेपाली कांग्रेसमा प्रवेश गरेका छन्।
ADVERTISEMENT
गोलेलाई इन्द्रबहादुर बानियाँले औपचारिक रूपमा पार्टीमा स्वागत गर्दै सदस्यता प्रदान गरेका हुन्। पार्टी प्रवेश कार्यक्रमलाई सम्बोधन गर्दै बानियाँले वर्तमान राजनीतिक परिस्थितिमा लोकतान्त्रिक मूल्य–मान्यताको रक्षा र सुदृढीकरण अपरिहार्य रहेको उल्लेख गरे। उनले राष्ट्रको स्थायित्व, विकास र सुशासनका लागि लोकतन्त्रवादी शक्तिहरूबीच सहकार्य र एकता आवश्यक रहेको धारणा राखे। “कांग्रेस समावेशी, विकासमुखी र जनउत्तरदायी राजनीतिक अभ्यासमा विश्वास गर्ने पार्टी हो,” उनले भने, “नयाँ साथीसँगै संगठन अझ बलियो र जनमुखी बन्नेछ।”
ADVERTISEMENT
बानियाँले विशेषगरी स्थानीय तहमा प्रभावशाली नेतृत्वको आवश्यकता औंल्याउँदै भिमफेदी क्षेत्रको समग्र विकास, पूर्वाधार विस्तार, शिक्षा–स्वास्थ्य सुदृढीकरण र रोजगारी सिर्जनामा कांग्रेसले स्पष्ट दृष्टिकोण अघि सारेको बताए। उनले जनताको विश्वास जित्ने गरी काम गर्न नवप्रवेशी नेता–कार्यकर्तालाई आग्रह समेत गरे।
नवप्रवेशी गोलेले आफूले लामो समय स्थानीय राजनीतिमा सक्रिय भूमिका निर्वाह गरेको उल्लेख गर्दै अब लोकतान्त्रिक धारलाई सशक्त बनाउने उद्देश्यले कांग्रेस रोजेको बताए। “जनताको चाहना विकास, पारदर्शिता र स्थायित्व हो,” उनले भने, “भिमफेदी–९ मात्र होइन, समग्र क्षेत्रको हितका लागि कांग्रेसमार्फत सक्रिय र इमानदार भूमिका खेल्नेछु।”
स्थानीय तहका दुई निर्वाचनमा उम्मेदवार बनेर प्रतिस्पर्धा गरिसकेका गोलेको कांग्रेस प्रवेशलाई भिमफेदी क्षेत्रको राजनीतिमा अर्थपूर्ण घटनाका रूपमा हेरिएको छ। राजनीतिक विश्लेषकहरूका अनुसार यस कदमले स्थानीय शक्ति–सन्तुलनमा प्रभाव पार्न सक्ने अनुमान गरिएको छ। गोले २०७४ सालमा वडा अध्यक्षको उम्मेदवार थिए ।
कांग्रेसका स्थानीय नेताहरूले गोलेको आगमनले संगठन विस्तार, कार्यकर्ता उत्साहवृद्धि तथा आगामी निर्वाचन तयारीमा सकारात्मक ऊर्जा थप्ने बताएका छन्। कार्यक्रममा प्रदेश तथा जिल्ला तहका नेता–कार्यकर्ता, शुभेच्छुक र स्थानीय बासिन्दाको उल्लेखनीय उपस्थिति रहेको थियो।
