उद्योग वाणिज्य संघको चुनावी माहोल तातियो, शुक्रबार मतदान

काठमाडौं – नेपाल उद्योग वाणिज्य महासंघको वरिष्ठ उपाध्यक्ष पदको निर्वाचन निर्धारित समयमै हुने भएको छ। निर्वाचन रोक्ने प्रयास र मागहरू उठे पनि संघले शुक्रबार नै मतदान गराउने निर्णयलाई यथावत राखेको जनाएको छ।

संघ स्रोतका अनुसार नेतृत्व चयन प्रक्रिया रोक्ने विषयमा केही समूहले असन्तुष्टि जनाए पनि संस्थागत नियमअनुसार निर्वाचन अघि बढाइने तयारी गरिएको छ।

यससँगै चुनावी माहोल झनै तातिएको छ र उम्मेदवारहरू आ–आफ्नो पक्षमा समर्थन जुटाउन सक्रिय भएका छन्।
वरिष्ठ उपाध्यक्ष पदलाई संघको भावी नेतृत्वको प्रमुख आधार मानिने भएकाले यस पदका लागि प्रतिस्पर्धा विशेष रूपमा चासोको विषय बनेको छ। व्यवसायी समुदायमा यस निर्वाचनलाई प्रतिष्ठा र प्रभाव दुवैसँग जोडेर हेरिएको छ।

महासंघका अध्यक्ष अन्जन श्रेष्ठका अनुसार पूर्वसूचित निर्धारित कार्यक्रम अनुसार कार्यकारणी समिति बैठक र निर्वाचन प्रक्रिया सञ्चालन हुने छ ।

महासंघको वरिष्ठ उपाध्यक्षका लागि रामचन्द्र संघई, सुरकृष्ण श्रेष्ठ, हेमराज ढकाल र भरतराज आचार्यको नाम चर्चामा छ ।

निर्वाचन समितिले सबै तयारी पूरा भएको र मतदान प्रक्रिया शान्तिपूर्ण, पारदर्शी तथा निर्धारित मितिमै सम्पन्न हुने विश्वास व्यक्त गरेको छ।
यता, विभिन्न व्यवसायिक समूहहरूले पनि निर्वाचनलाई रोक्ने भन्दा सहमतिमै अघि बढाउनुपर्ने धारणा राख्दै आएका छन्। शुक्रबार हुने मतदानपछि संघको नेतृत्व संरचना थप स्पष्ट हुने अपेक्षा गरिएको छ।