मानव अधिकार आयोगको प्रतिवेदनप्रति नेपाली कांग्रेसको आपत्ति, निष्पक्ष छानबिनको माग

काठमाडौं- नेपाली कांग्रेसले राष्ट्रिय मानव अधिकार आयोगले सार्वजनिक गरेको प्रतिवेदनप्रति गम्भीर ध्यानाकर्षण भएको जनाएको छ। पार्टी केन्द्रीय कार्यालय बीपी स्मृति भवन, सानेपाबाट जारी प्रेस विज्ञप्तिमार्फत कांग्रेसले आयोगको प्रतिवेदनमा उल्लेख गरिएका विषयवस्तुप्रति असन्तुष्टि व्यक्त गर्दै निष्पक्ष अनुसन्धान र तथ्यमा आधारित निष्कर्ष आवश्यक रहेको बताएको हो।

विज्ञप्तिमा नेपाली कांग्रेसले आफ्नो स्थापना कालदेखि नै लोकतन्त्र, मानव अधिकार, प्रेस स्वतन्त्रता तथा नागरिक अधिकारको पक्षमा निरन्तर संघर्ष गर्दै आएको स्मरण गराएको छ। पार्टीले जनताको अधिकार र स्वतन्त्रताका लागि पटक–पटक आन्दोलन तथा बलिदानीपूर्ण इतिहास बोकेको उल्लेख गर्दै कुनै पनि प्रकारको अन्याय, दमन र हिंसाको विपक्षमा सधैं उभिँदै आएको जनाएको छ।

कांग्रेसले राष्ट्रिय मानव अधिकार आयोगले सार्वजनिक गरेको प्रतिवेदनमा केही विषयहरू पर्याप्त अध्ययन र निष्पक्ष अनुसन्धानबिनै समावेश गरिएको आरोप लगाएको छ। घटनाको वास्तविकता, परिस्थितिको गहिरो विश्लेषण तथा सम्बन्धित पक्षको भनाइलाई समेटेर मात्र निष्कर्ष निकाल्नुपर्नेमा पार्टीले जोड दिएको छ।

प्रेस विज्ञप्तिमा आन्दोलन तथा प्रदर्शनका क्रममा भएका गतिविधिबारे सत्यतथ्य छानबिन हुनुपर्ने उल्लेख गर्दै दोषी जोसुकै भए पनि कानुनी दायरामा ल्याउनुपर्ने माग गरिएको छ। साथै, शान्तिपूर्ण आन्दोलनलाई हिंसात्मक बनाउन खोज्ने तत्वप्रति सचेत रहन आग्रह गरिएको छ।

कांग्रेसले अभिव्यक्ति स्वतन्त्रता, नागरिक अधिकार र लोकतान्त्रिक मूल्य मान्यताको सम्मान गर्दै राज्यका निकायहरूले आफ्नो भूमिकालाई निष्पक्ष, जिम्मेवार र विश्वसनीय बनाउनुपर्ने आवश्यकता औंल्याएको छ। आयोग जस्तो संवैधानिक निकायले तथ्यमा आधारित प्रतिवेदन सार्वजनिक गर्नुपर्नेमा जोड दिँदै पार्टीले भविष्यमा यस्ता विषयमा थप संवेदनशील बन्न आग्रह गरेको छ।

विज्ञप्तिमा सामाजिक सद्भाव, लोकतान्त्रिक संस्कार र कानुनी शासनलाई कमजोर पार्ने गतिविधि कसैका लागि पनि स्वीकार्य नहुने उल्लेख गरिएको छ। साथै, कानुन विपरीतका गतिविधिमा संलग्न व्यक्तिमाथि प्रचलित कानुनअनुसार कारबाही गर्न सरकारसँग माग गरिएको छ।