साहित्यकार शोभा अधिकारीद्वारा लिखित “सफलताको २७ स्वर्णिम सूत्रहरू” पुस्तक सार्वजनिक

काठमाडौं- साहित्यकार शोभा अधिकारीको सफलताको २७ स्वर्णिम सूत्रहरू पुस्तक सार्वजनिक गरिएको छ ।

शनिबार  पद्मकन्या बहुमुखी क्याम्पसमा आयोजित पुस्तकको लोकार्पण बीच जीवन विज्ञान प्रतिष्ठानका संस्थापक एलपी भानु शर्मा र अभिनेता दयाहाङ राईलगाएतले उक्त पुस्तकको लोकार्पण गरेका हुन् । पुस्तकमा आत्म प्रेम, आत्मस्वीकृति र आत्मसम्मान, सुखी, खुसी र सन्तुष्ट हुने उपाय, डर हटाउने, व्यक्तित्व विकासका सूत्र, जीवनलाई आनन्दित बनाउने कला, पारिवारिक सम्बन्ध सुमधुर बनाउने आधार, प्रविधिको सदुपयोग, सकारात्मक सोच, विचार र जीवन रुपान्तरणलगायत सूत्रहरू समेटिएको साहित्यकार अधिकारीले बताएकी छिन ।

साहित्यकार अधिकारी नेपाली साहित्य क्षेत्रमा सक्रिय स्रष्टाका रूपमा परिचित छिन। यसअघि उनको चर्चित लघुकथा सङ्ग्रह ‘आमाको आँखा’ सहित विभिन्न कृतिहरू प्रकाशित भइसकेका छन्। उनले साहित्यका माध्यमबाट सामाजिक चेतना, मानवीय मूल्य र जीवनका सकारात्मक पक्षहरू उजागर गर्दै आएकी छिन।

‘सफलताका २७ स्वर्णिम सूत्रहरू’ पुस्तकले विशेषगरी युवा पुस्ता, विद्यार्थी, व्यवसायी तथा जीवनमा सकारात्मक परिवर्तन खोजिरहेका पाठकहरूलाई मार्गदर्शन गर्ने अपेक्षा गरिएको छ। पुस्तकमा समेटिएका सूत्रहरूले पाठकलाई आफ्नो क्षमता पहिचान गर्न, आत्मबल बढाउन तथा जीवनका विभिन्न चुनौतीहरूलाई अवसरका रूपमा रूपान्तरण गर्न प्रेरित गर्ने विश्वास गरिएको छ।

कार्यक्रमका वक्ताहरूले यस्ता प्रेरणामूलक पुस्तकहरूको आवश्यकता आजको समाजमा झन् बढ्दै गएको उल्लेख गर्दै पुस्तकले पाठकमाझ सकारात्मक सन्देश प्रवाह गर्ने विश्वास व्यक्त गरेका थिए। पुस्तक सार्वजनिक भएसँगै साहित्यकार शोभा अधिकारीको यो कृतिले पाठकहरूबाट राम्रो प्रतिक्रिया प्राप्त गर्ने अपेक्षा गरिएको छ।