विद्यालय शिक्षा विधेयकले दीर्घकालीन शिक्षा समस्या समाधान गर्ने : शिक्षामन्त्री पोखरेल

काठमाडौं- सरकारका प्रवक्ता एवं शिक्षामन्त्री सस्मित पोखरेलले दिर्घकालीन समस्या समाधान हुने गरि विद्यालय शिक्षा विधेयक छिटै ल्याइने जानकारी दिएका छन् ।

बिहीबार चितवनको भरतपुर बिमानस्थलमा सञ्चारकर्मीसंग कुरा गर्दै मन्त्री पोखरेलले अवको ५० बर्षसम्मका शिक्षा क्षेत्रका सम्भावित चुनौतीहरूलाई सम्बोधन गर्ने गरि विद्यालय शिक्षा विधेयक ल्याइने जानकारी दिएका हुन्।

उनले वर्तमान समयमा प्रविधिको विकास र एआईको बढ्दो प्रयोग जस्ता विषयहरूलाई समेट्ने गरी विधेयक आउने बताएका छन् ।  मन्त्री पोखरेलले नेपालभरिको सम्पूर्ण विद्यालय पाठ्यक्रमलाई पूर्ण रूपमा पुनर्संरचना गर्नका लागि एउटा कार्यदल गठन गरी काम अगाडि बढाइसकिएको जानकारी दिएका छन्।

शैक्षिक गुणस्तर अभिवृद्धिका लागि शिक्षकहरूको तालिम सम्बन्धी कार्यक्रमहरूलाई पनि अगाडि बढाइएको उनको भनाइ छ ।

मन्त्री पोखरेलले विद्यालयहरूको वास्तविक आवश्यकता पहिचानगरी सोही आधारमा मात्र बजेट विनियोजन गर्ने कार्यक्रमहरू अगाडि सारिएको उल्लेख गरेका छन् । चितवनमा रहेका विश्वविद्यालय, क्याम्पस र स्कुलको स्थलगत निरीक्षणका लागि मन्त्री पोखरेल चितवन पुगेका छन् ।