बोरिङ भुक्तानीमा ७ लाख ५० हजार घुस लिँदै डिभिजन प्रमुखसहित दुई जना पक्राउ

सर्लाही – सर्लाहीस्थित भूमिगत जलश्रोत तथा सिंचाई विकास डिभिजन कार्यालयका डिभिजन प्रमुख अनुपमा ढकाल र मेकानिकल अधिकृत तुलाकान्त चौधरी ७ लाख ५० हजार रुपैयाँ घुस लिएको आरोपमा पक्राउ परेका छन्।

अख्तियार दुरुपयोग अनुसन्धान आयोगका अनुसार बोरिङ र मोटर जडानको काम सम्पन्न भएपछि भुक्तानीका क्रममा सेवाग्राहीसँग घुस मागेको भन्ने उजुरीका आधारमा खटिएको टोलीले उनीहरूलाई सेवाग्राहीबाट ७ लाख ५० हजार रुपैयाँ घुस लिइसकेको अवस्थामा नियन्त्रणमा लिएको हो।

उनीहरूलाई सर्लाहीको बागमती नगरपालिका–१२ स्थित कार्यालय प्रमुखको सरकारी क्वार्टरबाट पक्राउ गरिएको आयोगले जनाएको छ। सो क्रममा घुस रकमसहित स्रोत नखुलेको ७१ हजार ११५ रुपैयाँ नगद र तीन थान मोबाइल समेत बरामद गरिएको छ। घटनाबारे थप अनुसन्धान भइरहेको अख्तियारले जनाएको छ।