काठमाडौं- कर्णाली प्रदेशको मुख्यमन्त्री पदका लागि नेकपा संसदीय दलका नेता मंगलबहादुर शाहीले २३ जना प्रदेशसभा सदस्यको समर्थनसहित सरकार गठनको दाबी प्रस्तुत गरेका छन्।
ADVERTISEMENT
शाहीले नेकपाका १४ र नेकपा (एमाले)का ९ गरी २३ जना प्रदेशसभा सदस्यको हस्ताक्षरसहित संविधानको धारा १६८ को उपधारा (२) बमोजिम प्रदेश प्रमुख यज्ञराज जोशीसमक्ष मुख्यमन्त्री नियुक्तिका लागि दाबी पेस गरेका हुन्।
ADVERTISEMENT
यसअघि तत्कालीन मुख्यमन्त्री यामलाल कँडेलले पदबाट राजीनामा दिएपछि प्रदेश प्रमुख जोशीले संविधानअनुसार बहुमतको आधारमा नयाँ सरकार गठनका लागि सोमबार साँझ ५ बजेसम्म दाबी पेस गर्न आह्वान गरेका थिए।
निर्धारित समयसीमाभित्र बहुमत सदस्यको समर्थनसहित शाहीले दाबी पेस गरेपछि कर्णाली प्रदेशमा नयाँ सरकार गठनको प्रक्रिया औपचारिक रूपमा अघि बढेको छ। प्रदेश प्रमुखले दाबीको संवैधानिक आधार र समर्थनको पुष्टि गरेपछि नयाँ मुख्यमन्त्री नियुक्त गर्ने अपेक्षा गरिएको छ।
शाही नेतृत्वमा सरकार गठन भएमा कर्णालीमा एमाले–नेकपाको सहकार्यमा नयाँ मन्त्रिपरिषद् गठन हुने सम्भावना रहेको छ। नयाँ सरकारले प्रदेशको विकास, बजेट कार्यान्वयन र सेवा प्रवाहलाई प्राथमिकतामा राख्ने अपेक्षा गरिएको छ।
कर्णाली प्रदेशमा मुख्यमन्त्री परिवर्तनसँगै प्रदेशको राजनीतिक समीकरण पनि फेरिएको छ। नयाँ सरकार गठनको प्रक्रियाले आगामी दिनमा प्रदेशको सत्ता सञ्चालन र राजनीतिक स्थायित्वमा महत्वपूर्ण प्रभाव पार्ने विश्वास गरिएको छ।
