काठमाडौं – प्रभु महालक्ष्मी लाइफले आर्थिक वर्ष २०८२/८३ को चौथो त्रैमासिकसम्म ३७ करोड ५५ लाख रुपैयाँभन्दा बढी खुद नाफा कमाएको छ।
ADVERTISEMENT
कम्पनीले सार्वजनिक गरेको अपरिष्कृत वित्तीय विवरणअनुसार समीक्षा अवधिमा कम्पनीको खुद नाफा ३७ करोड ५५ लाख ९३ हजार रुपैयाँ पुगेको हो।
ADVERTISEMENT
गत आर्थिक वर्षको सोही अवधिमा कम्पनीको खुद नाफा ३७ करोड ७ लाख ४३ हजार रुपैयाँ रहेको थियो। यसअनुसार चालु आर्थिक वर्षमा कम्पनीको नाफा १.३१ प्रतिशतले बढेको छ।
कम्पनीको जीवन बीमा कोष पनि उल्लेख्य रूपमा बढेको छ। समीक्षा अवधिमा जीवन बीमा कोष १८ अर्ब ३६ करोड ८१ लाख रुपैयाँ पुगेको छ, जुन अघिल्लो आर्थिक वर्षको १३ अर्ब ८३ करोड ३६ लाख रुपैयाँको तुलनामा ३२.७८ प्रतिशतले बढी हो।
त्यस्तै, कम्पनीको कुल आर्जित बीमाशुल्क ६ अर्ब ४९ करोड ८४ लाख रुपैयाँ पुगेको छ। अघिल्लो वर्षको ५ अर्ब ३७ करोड ३३ लाख रुपैयाँको तुलनामा कुल आर्जित बीमाशुल्क २०.९४ प्रतिशतले वृद्धि भएको हो।
कम्पनीको खुद आर्जित बीमाशुल्क पनि २०.९७ प्रतिशतले बढेर ६ अर्ब २६ करोड ५७ लाख रुपैयाँ पुगेको छ। पुनर्बीमा कम्पनीलाई दिइएको बीमाशुल्क अर्थात् प्रिमियम सेडेड २०.१९ प्रतिशतले बढेर २३ करोड २७ लाख रुपैयाँ पुगेको वित्तीय विवरणमा उल्लेख छ।
यसैगरी, बीमालेख धितोमा प्रदान गरिने कर्जा अर्थात् पोलिसी होल्डर्स लोन २३.३३ प्रतिशतले बढेर १ अर्ब ५० करोड ७६ लाख रुपैयाँ पुगेको छ। कम्पनीको ग्रस क्लेम आउटस्ट्यान्डिङ भने ६५.७२ प्रतिशतले घटेर ६७ लाख २१ हजार रुपैयाँमा सीमित भएको छ।
कम्पनीको प्रतिसेयर आम्दानी (EPS) ७.०८ रुपैयाँ र प्रतिसेयर नेटवर्थ ११६.५८ रुपैयाँ रहेको छ। चुक्ता पुँजी ४ प्रतिशतले वृद्धि भएर ५ अर्ब ३० करोड ७९ लाख रुपैयाँ पुगेको छ।
समग्रमा, बीमा कोष, बीमाशुल्क तथा खुद आर्जित बीमाशुल्कमा भएको दोहोरो अंकको वृद्धिले कम्पनीको बीमा व्यवसाय विस्तार हुँदै गएको देखाएको छ। यद्यपि, खुद नाफाको वृद्धि भने तुलनात्मक रूपमा न्यून रहेको वित्तीय विवरणले देखाउँछ।
