नेपालको बाढीप्रति भारतीय प्रधानमन्त्री मोदीद्वारा दुःख व्यक्त प्रधानमन्त्री बालेन्द्र शाहसँग संवाद, उद्धार र राहतमा भारतले सम्भव सबै सहयोग गर्ने

काठमाडौं- नेपालमा आएको भीषण बाढीबाट भएको जनधनको क्षतिप्रति भारतीय प्रधानमन्त्री नरेन्द्र मोदीले दुःख व्यक्त गरेका छन्। मोदीले प्रधानमन्त्री बालेन्द्र शाहसँग टेलिफोनमार्फत कुराकानी गर्दै बाढीका कारण ज्यान गुमाएका नागरिकप्रति समवेदना व्यक्त गरेका हुन्।

कुराकानीका क्रममा मोदीले विपद्को यस कठिन घडीमा भारतका जनता नेपाली दाजुभाइ तथा दिदीबहिनीको साथमा रहेको बताएका छन्। उनले बाढीबाट प्रभावित परिवारप्रति गहिरो दुःख व्यक्त गर्दै नेपाल सरकार तथा नेपाली जनताप्रति ऐक्यबद्धता जनाएका छन्।

भारतीय प्रधानमन्त्री मोदीले नेपाललाई आवश्यक पर्ने सम्भव सबै मानवीय सहायता उपलब्ध गराउन भारत तयार रहेको प्रतिबद्धता समेत व्यक्त गरेका छन्। उनले उद्धार, खोजी तथा राहत कार्यमा नेपाललाई आवश्यक सहयोग उपलब्ध गराउन भारतले प्राथमिकता दिने बताएका छन्।

मोदीका अनुसार भारतका सम्बन्धित टोलीले नेपालमा भइरहेको उद्धार तथा राहत प्रयासबारे नेपाली पक्षसँग नजिकबाट समन्वय गरिरहेका छन्। विपद्का कारण प्रभावित नागरिकको उद्धार, राहत सामग्रीको व्यवस्थापन तथा आवश्यक मानवीय सहयोगका लागि दुवै पक्षबीच समन्वय भइरहेको जनाइएको छ।

यसैबीच, प्रधानमन्त्री बालेन्द्र शाहले नेपालमा बाढीबाट उत्पन्न अवस्थाबारे भारतीय प्रधानमन्त्री मोदीलाई जानकारी गराएको बताइएको छ। बाढी प्रभावित क्षेत्रमा नेपाली सेना, नेपाल प्रहरी र सशस्त्र प्रहरी बलसहितका सुरक्षा निकाय उद्धार तथा खोजी कार्यमा परिचालित छन्।

भोटेकोशी नदीमा आएको भीषण बाढीका कारण रसुवालगायतका क्षेत्रमा ठूलो जनधनको क्षति भएको छ। बाढीले सडक, पुल, जलविद्युत् आयोजना तथा अन्य भौतिक संरचनामा समेत क्षति पुर्‍याएको छ भने केही नागरिक सम्पर्कविहीन भएका छन्।

विपद्को यस कठिन समयमा छिमेकी मुलुक भारतले नेपालसँग ऐक्यबद्धता जनाउँदै उद्धार तथा राहतमा सम्भव सबै मानवीय सहयोग गर्ने प्रतिबद्धता जनाएको हो। मोदीको यो प्रतिबद्धतालाई नेपालमा जारी उद्धार तथा राहत अभियानमा थप सहयोग पुग्ने अपेक्षा गरिएको छ।