काठमाडौं- एक्सट्रिम इनर्जी ड्रिंक नेपाल भलिबल लिग (एनभीएल) मा मधेश वारियर्सले पहिलो जित निकालेको छ । लगातार तीन खेलमा पराजित भएको मधेशले चौथो खेलमा खप्तड फाल्कन्सलाई सोझो सेटमा पराजित गर्दै प्रतियोगितामा जितको खाता खोलेको हो ।
ADVERTISEMENT
त्रिपुरेश्वरस्थित राष्ट्रिय खेलकुद परिषद्को कभर्डहलमा भएको खेलमा रविन नगरकोटी मार्की खेलाडी रहेको मधेशले धिरोज बस्नेत मार्की खेलाडी रहेको खप्तड फाल्कन्सलाई ३–० को सेटमा हरायो ।
ADVERTISEMENT
मधेशले पहिलो सेट २५–२१, दोस्रो सेट २५–२० र तेस्रो सेट २५–२३ ले आफ्नो पक्षमा पार्यो । जितसँगै मधेशले लगातार तीन खेलको हारको शृंखला अन्त्य गरेको छ ।
मधेशका जियोभिन सेबास्टियन खेलको ‘म्यान अफ द म्याच’ घोषित भए ।
मधेश यसअघि पहिलो खेलमा सगरमाथा स्म्यासर्ससँग ३–१, दोस्रो खेलमा काठमाडौं रेड्ससँग ३–२ र तेस्रो खेलमा अन्नपूर्ण स्पाइकर किङ्ससँग ३–१ को सेटमा पराजित भएको थियो । पहिलो खेलमै सगरमाथासँग ३–१ ले हारेको मधेशले त्यसपछि काठमाडौं रेड्ससँग कडा प्रतिस्पर्धा गरे पनि जित निकाल्न सकेको थिएन ।
यता, खप्तड फाल्कन्सको भने लगातार तेस्रो हार हो । यसअघिका दुई खेलमा पनि खप्तड सोझो सेटमा पराजित भएको थियो । खप्तडलाई सगरमाथा स्म्यासर्स र कर्णाली शिवराजले पराजित गरेका थिए ।
एनभीएलमा ६ फ्रेन्चाइज टोली सहभागी छन् । मधेश वारियर्स, खप्तड फाल्कन्स, सगरमाथा स्म्यासर्स, काठमाडौं रेड्स, अन्नपूर्ण स्पाइकर किङ्स र कर्णाली शिवराजले पहिलो संस्करणमा प्रतिस्पर्धा गरिरहेका छन् ।
लिग चरणमा प्रत्येक टोलीले एकअर्काविरुद्ध प्रतिस्पर्धा गर्नेछन् । लिगको शीर्ष स्थानमा रहने टोली सिधै फाइनलमा पुग्नेछ भने दोस्रो र तेस्रो स्थानमा रहने टोलीले फाइनल प्रवेशका लागि प्लेअफ खेल्नेछन् ।
नेपालको पुरुष भलिबलमा पहिलोपटक आयोजना भएको फ्रेन्चाइज लिगले खेलाडीलाई व्यावसायिक रूपमा अघि बढाउने र नेपाली भलिबलको प्रतिस्पर्धात्मक स्तर विस्तार गर्ने लक्ष्य राखेको छ ।
अब एनभीएलमा मंगलबार काठमाडौं रेड्स र सगरमाथा स्म्यासर्सबीच खेल हुनेछ । मधेशको पहिलो जितले लिगको प्रतिस्पर्धालाई थप रोमाञ्चक बनाएको छ ।
