अबको चुनावमा कांग्रेस शून्य बन्ने खतरा छ, तत्काल पार्टीका लागि काम गरौं : सुजाता कोइराला

रुपन्देही । कांग्रेस केन्द्रीय सदस्य सुजाता कोइरालाले आन्तरिक विवादका कारण पार्टी कमजोर भएको बताएकी छन् । प्रेस युनियन रुपन्देहीले शुक्रबार बुटवलमा गरेको पत्रकार भेटघाटमा नेतृ कोइरालाले विवाद यथावत रहे आगामी निर्वाचनमा कांग्रेस शून्य हुने बताइन् ।

‘आन्तरिक विवादकै कारण पार्टी कमजोर बनेको छ। विवाद नमिले आउने चुनावमा कांग्रेस शून्य हुन्छ’, कोइरालाले भनिन्।

सभापति देउवाको पदलोलुपताका कारण पार्टी कमजोर बनेको नेतृ कोइरालाको आरोप छ। व्यक्तिभन्दा संस्थाकेन्द्रित काम गर्नु पर्नेमा त्यसो हुन नसकेको उनको गुनासो छ ।

पार्टीमा गुट र किचलो भइरहे कांग्रेसलाई मत दिँदा कार्यकर्ता र आम नागरिकको हात काप्ने स्थिति आउन सक्नेतर्फ ध्यान दिनुपर्ने उनले बताइन्।

पार्टीभित्रको विवाद तत्काल अन्त्य गरी संगठन निर्माणतर्फ लाग्नु पर्ने कोइरालाले जोड छ ।

कोइरालाले कांग्रेस बलियो भएमात्रै लोकतन्त्र बलियो हुने बताएकी छन् ।