काठमाडौं – नेपाली कांग्रेसको केन्द्रीय समितिको बैठकमा महामन्त्री गगन थापाले पूर्वमन्त्री तथा केन्द्रीय सदस्य मोहन बस्नेतले आफूमाथि लगाएको ‘गम्भीर, अराजनीतिक, अशिष्ट र अमर्यादित’ आरोपलाई फोहोरको संज्ञा दिएका छन्। थापाले केन्द्रीय समिति बैठकमा बस्नेतले आफूमाथि लगाएको आरोपलाई खारेज गर्दै भनेका छन् – ‘फोहोर चलाएर म फोहोरी बन्न चाहन्न।’
ADVERTISEMENT
टेरामाक्स प्रकरणमा मुछिँदै आएर धरौटीमा छुटेका मोहन बस्नेतले केन्द्रीय बैठकमा गगन थापालाई लक्षित गर्दै आरोप लगाए पछि थापाले ती आरोपलाई “राजनीतिको तह र सभ्यताको सीमा नाघ्ने” भन्दै जवाफ फर्काएका हुन्। उनले कुनै आरोपको प्रतिवाद गर्नुको सट्टा त्यसलाई खारेज गर्ने शैली अपनाउँदै भनेका छन्, ‘बाले भन्नुहुन्थ्यो, कसैले आरोप लगाए दिइहाल्नुपर्छ जवाफ। आमाले भन्नुहुन्थ्यो, फोहोर नचलाउनु — फोहोर चलाए आफैँ फोहोरी भइन्छ। आज म आमाको कुरा सुन्छु।’
ADVERTISEMENT
थापाले सभापति शेरबहादुर देउवालाई प्रत्यक्ष सम्बोधन गर्दै, आफ्नो अनुपस्थितिमा केन्द्रीय समितिको बैठकमा धम्कीपूर्ण भाषा र अभद्र व्यवहार देखाउने प्रवृत्तिको आलोचना गरे। उनले भने, ‘म तरुण दलको अनशनरत साथीहरूको माग सम्बोधन गर्न वार्तामा थिएँ। तर बैठकभित्रै एक केन्द्रीय सदस्यले हुंकार मिश्रित धम्की दिनुभयो रे। त्यो नैतिक पतन हो।’
सोमबार बसेको काँग्रेस केन्द्रीय समितिको बैठकमा काँग्रेस केन्द्रीय सदस्य मोहन बस्नेतले टेरामक्स लगायतका भ्रष्टाचार प्रकरणमा आफूविरुद्ध मुद्दा दायर गराउनुमा गगन थापाको हात रहेको आरोप लगाएका थिए । उनले गगनले उक्त प्रकरणबारे संसदमा बोलेर अख्तियार पठाउने गरेको र सोही अनुसार अख्तियारले आफूविरुद्ध मुद्दा दायर गरेको जिकिर गरेका थिए ।
साथै उनले गगन थापा पनि थुप्रै प्रकरणमा मिसिएकाले प्रतिशोध लिए नछोड्ने बताएका थिए ।
