संसदीय समितिका सदस्यको गुनासो : हाम्रा निर्णय कार्यान्वयन भएनन्

काठमाडौँ – सङ्घीय संसद् राष्ट्रियसभा दिगो विकास तथा सुशासन समितिका सदस्यहरुले समितिले पटकपटक सम्बन्धित मन्त्रालयलाई निर्देशन दिए पनि कार्यान्वयन नभएको भन्दै गुनासो गरेका छन् ।

समितिको आजको बैठकमा अधिकांश सांसदले भौतिक पूर्वाधार तथा यातायात र सहरी विकास लगायतका मन्त्रालयलाई विभिन्न विषयमा निर्देशन दिए पनि कार्यान्वयन नगरी समितिको अपहेलना गरेको भन्दै अहिलेसम्मका निर्देशन कार्यान्वयन भए-नभएको बारे समितिले नै अनुगमन गर्नुपर्नेमा जोड दिए ।

समितिका सदस्य दीनानाथ शर्माले अहिलेसम्म समितिले दिएको निर्देशन कार्यान्वयन भए-नभएको बारेमा सम्बन्धित मन्त्रालयका मन्त्री वा सचिवलाई बैठकमा आमन्त्रण गरी जवाफ माग्नुपर्ने बताए ।

सांसद विमला राई पौडेलले निर्देशन कार्यान्वयन सम्बन्धमा अनुगमन गर्दै बजार अनुगमनलाई पूर्णता दिनुपर्नेमा जोड दिए । सांसद कालीबहादुर मल्ल र खिमकुमार विकले बजार अनुगमनसँगै छड्के अनुगनलाई प्रभावकारी बनाउनुपर्ने बताए । सांसद कमलाकुमारी ओलीले पछिल्लो समयमा यातायात क्षेत्रमा समस्या बढ्दै गएको भन्दै समस्या समाधानका लागि अनुगमनपछि मन्त्रालयलाई निर्देशन दिनुपर्ने बताए ।

सांसद महेशकुमार महरा, भैरवसुन्दर श्रेष्ठ, मुक्ताकुमारी यादव, कविता बोगटी लगायतले सरकारले राष्ट्रियसभाअन्तर्गतको दिगो विकास समितिको निर्देशन किन मान्दैन भन्दै प्रश्न गरे । सभापति तारादेवी भट्टले समितिले दिएका निर्देशन कार्यान्वयन भए÷नभएको बारे सम्बन्धित मन्त्रालयसँग जवाफ माग्ने बताए ।