तेस्रो पटक दिल्ली मुख्यमन्त्रीको सपथ लिँदै केजरीवाल

एजेन्सी– दिल्ली विधानसभामा शानदार जित हासिल गरेपछि आम आदमी पार्टी (आप) का प्रमुख अरबिन्द केजरीवालले आज तेस्रोपटक मुख्यमन्त्री पदको सपथ लिँदैछन्। सपथ रामलीला मैदानमा हुँदैछ। पहिलोपटक डिसेम्बर २०१३ र दोस्रोपटक फेब्रुअरी २०१५ मा पनि केजरीवालले यही मैदानमा मुख्यमन्त्रीको सपथ लिएका थिए।समारोहमा मन्त्री र विधायक परिवारका साथ सहभागी हुनेछन्।

केजरीवालले सपथ ग्रहण समारोहमा प्रधानमन्त्री नरेन्द्र मोदीलाई पनि निम्ता दिएका छन्। यसबाहेक दिल्लीका सांसद, सबै निगम पार्षद, भाजपा र कांग्रेसका प्रदेश अध्यक्ष पनि निम्त्याइएका छन्।

केजरीवालले २०१३ मा कांग्रेसको समर्थनमा ४९ दिनसम्म सरकार चलाएपछि राजीनामा दिएका थिए। त्यसपछि फेब्रुअरी २०१५ मा भएको चुनावमा ७०मध्ये ६७ सिट जितेका थिए । यसपटक आपले ६२ सिट जितेको छ। यसपटक केजरीवाललाई उपराज्यपाल अनिल बैजलले सपथ दिलाउनेछन्।