पोखरा – गण्डकी प्रदेशका सामाजिक विकासमन्त्री नरदेवी पुनले कोभिड–१९ को महामारीमा पनि विद्यार्थीको सिकाइलाई निरन्तरता दिनुपर्नेमा जोड दिएकी छन् ।
तनहुँ जिल्लाका स्थानीय तहका प्रमुख, उपप्रमुखसँग आज भिडियो कन्फरेन्समार्फत छलफल गर्दै मन्त्री पुनले विद्यालय बन्द भएको अवस्थामा विद्यार्थीको सिकाइलाई निरन्तरता दिन आवश्यक रहेकामा जोड दिइन्।
जिल्ला समन्वय समितिका प्रमुख शान्तिरमण वाग्लेको अध्यक्षतामा भएको बैठकमा स्थानीय सरकार र विद्यालयले अहिलेको अवस्थामा गर्न सक्ने कार्यको विषयमा छलफल गरिएको थियो । शिक्षा, विकास तथा समन्वय एकाइ तनहुँका प्रमुख रमाकान्त शर्माका अनुसार स्थानीय सरकारले प्रधानाध्यापकको बैठक, विद्यालय र शिक्षकले गर्न सक्ने कार्यको खोजी, विद्यालय खुलेपछिको तयारी, योजना निर्माण, सूचना प्रविधिको प्रयोग, स्थानीय पाठ्यक्रमको निर्माण, पाठ्यपुस्तक वितरणलगायत गर्न सक्ने विषयमा छलफल गरिएको छ ।
भिडियो कन्फरेन्स बैठकमा जिल्लाका चार गाउँपालिका र छ गाउँपालिकाका प्रमुख, उपप्रमुख, अध्यक्ष तथा उपाध्यक्षहरुको सहभागिता थियो ।