काठमाडौँ – प्रधानमन्त्री केपी शर्मा ओलीले उत्तर प्रदेशका मुख्यमन्त्री योगी आदित्यनाथले नेपालबारे दिएको अभिव्यक्ति निन्दनीय रहेको बताएका छन् । आदित्यनाथले केही समय पहिले नेपालले सीमा निर्धारण गर्दा त्यसको परिणाम पनि ख्याल गर्नुपर्ने धम्कीपूर्ण आपत्तिजनक अभिव्यक्ति दिएका थिए ।
विनियोजन विधेयक, २०७७ अन्तर्गत प्रधानमन्त्री तथा मन्त्रिपरिषद्को कार्यालय तथा सम्बन्धित निकायका शीर्षकमाथिको छलफलमा उठेका प्रश्नको जवाफ दिनेक्रममा प्रधानमन्त्री ओलीले आदित्यनाथको अभिव्यत्ति नाजायज भएको बताए । ‘यदी उहाँले त्यसरी बोल्नु भएको हो भने त्यो जायज होइन ।’ उनले भने, ‘नेपाललाई यदि उहाँले धम्क्याउन खोज्नु भएको हो भने त्यो उचित होइन ।’
आदित्यथान केन्द्रीय सरकारको व्यक्ति पनि नभए पनि मुख्यमन्त्रीको रुपमा त्यसो उनले बोलेको हो भने अलोच्य विषय भएको प्रधानमन्त्री ओलीले बताए । उनले भने, ‘त्यो बोल्नु भएको र नेपाललाई त्यसरी धम्की दिनु भएको हो भने त्यो निन्दनीय विषय हो ।’
उनले आदित्यनाथको अभिव्यक्ति नेपालमाथिको अपहेलनाका रुपमा बुझ्ने भन्दै उनले भने, ‘नेपाल हेपिन तयार छैन, हेपिन मान्दैन भन्ने कुरा म योगीजीलाई स्मरण गराउन चाहन्छु ।’