कोसी अस्पतालको ओपीडी पुन: सञ्‍चालन

विराटनगर — चार दिनदेखि बन्द विराटनगरस्थित कोसी अस्पतालको बहिरंग सेवा (ओपीडी) मंगलबारदेखि पुन: सञ्चालन भएको छ । स्वास्थ्यकर्मी संक्रमित हुन थालेपछि अस्पताल व्यवस्थापनले बिहीबारदेखि अनिश्चितकालकालागि ओपीडी बन्द गरेको थियो ।

स्वाब परीक्षणपछि आएको रिपोर्टमा ओपीडीका थप स्वास्थ्यकर्मीमा संक्रमण नदेखिएकोले बन्द सेवा पुन: सञ्चालन गरिएको अस्पतालका मेडिकल सुपरिन्टेन्डेन्ट (मेसु) डा. चुमनलाल दासले बताए ।

गत शुक्रबारदेखि मंगलबारसम्म कोसी अस्पतालमा कोरोना संक्रमित स्वास्थ्यकर्मीसम्मको संख्या ११ पुगेको सूचना अधिकारी विष्णु बुढाथोकीले बताए । संक्रमित हुनेमा एक चिकित्सक, ६ नर्स र ४ सहयोगी कर्मचारी छन् ।