आइसोलेशनबाट गगनको प्रश्न, ‘सरकारको काम कोरोना संक्रमित गन्ने मात्र हो ?’

काठमाडौँ – नेपाली कांग्रेसका नेता तथा पूर्व स्वास्थ्यमन्त्री गगन थापाले प्रधानमन्त्री केपी शर्मा ओलीलाई सरकारको काम कोरोना संक्रमित गन्ने मात्र हो भनेर प्रश्न गरेका छन्।

सरकारले पीसीआर जाँच, उपचार र शव व्यवस्थापन आफै गर्नुपर्ने बताएपछि कोरोना देखिएर आइसोलशनमा बसेका थापले सरकारलाई खुद्रा निर्णय गर्नुभन्दा केही गर्न नसक्ने एकैपटक भनिदिन आग्रह गरेका छन्।

नागरिक स्वयंले कोरोना उपचार गर्नुपर्ने सरकारको निर्णयको विरोध गर्दै उनले पटक पटक खुद्रा निर्णय गर्नुभन्दा संक्रमित र मृतकको संख्या गन्नबाहेक सरकारले केही गर्न नसक्ने निर्णय गर्न सुझाव दिएका छन्।

सामाजिक सञ्जालमा थापाले लेखेका छन्, ‘स्वास्थ्य मन्त्रालयको पछिल्लो निर्णय कोरोना संक्रमितले आफ्नो उपचार आफैं गर्नू ? यसरी हरेक दिन खुद्राखुद्रामा यस्तो निर्णय गर्नुभन्दा प्रधानमन्त्रीज्यू बरु सिधै भनिदिनुस् सरकार स्वयं संक्रमित भएर आइसोलेसनमा रहेकोले अब उपरान्त संक्रमितको संख्या गन्नेबाहेक थप केही नगर्ने जानकारी गराइन्छ ।