काठमाडौँ – भारत सरकारको आर्थिक सहयोगमा निर्माण हुन लागेका सांस्कृतिक सम्पदा परियोजनाको पुनर्स्थापना र पुनर्निर्माण कार्यका लागि राष्ट्रिय पुनर्निर्माण प्राधिकरण तथा ठेकेदारहरुबीच तीनवटा ठेक्का सम्झौतामा हस्ताक्षर भएको छ।
ADVERTISEMENT
उक्त सम्झौता अन्तर्गत सिन्धुपाल्चोक जिल्लामा अवस्थित चिरी घ्याङ्ग गुम्बा, तार्के घ्याङ्ग गुम्बा र मेलाम्ची घ्याङ्ग गुम्बाको निर्माण हुन लागेको हो । भूकम्पले क्षति पुर्याएका २८ वटा सांस्कृतिक सम्पदाको संरक्षण र पुनर्स्थापना गर्नका लागि भारत सरकार र नेपाल सरकारबीच सहमति कायम भएको थियो । यी तीन परियोजनाहरु पनि सोही २८ वटा सांस्कृतिक सम्पदा अन्तर्गत पर्दछन् ।
ADVERTISEMENT
नेपालका आठ जिल्लामा भूकम्पले क्षति पुर्याएका सांस्कृतिक सम्पदा परियोजनाको संरक्षण, पुनर्स्थापना र पुनर्निर्माणका लागि भारत सरकारले ५० मिलियन अमेरिकी डलर आर्थिक सहयोग गर्ने प्रतिवद्धता जनाइसकेको छ । सोही प्रतिवद्धता अनुरुप यी परियोजनाहरुलाई अघि बढाइएको हो ।
मंगलबार आयोजित कार्यक्रममा पूर्व अर्थराज्यमन्त्री डा. लार्केल लामा, प्रदेश सभाका सदस्य निमा लामा, भारतीय राजदूतावासको विकास साझेदारी तथा पुनर्निर्माण प्रभागका दोस्रो सचिव, राष्ट्रिय पुनर्निर्माण प्राधिकरणको सांस्कृतिक परियोजनाका परियोजना निर्देशक, सम्बन्धित गुम्बाका अध्यक्ष, भारत सरकारको परियोजना परामर्शदाता इन्टेक तथा सरोकारवालाहरुको उपस्थिति थियो ।
सिन्धुपाल्चोक जिल्लामा बसोबास गर्ने शेर्पा र तामाङ्ग समुदाय विशेष गरी ह्योल्मो जातिका लागि यी तीनै गुम्बाले सिकाई केन्द्रको रुपमा काम गर्नुका साथै सिन्धुपाल्चोक क्षेत्रको पर्यटनलाई प्रवर्द्धन गर्न महत्वपूर्ण भूमिका खेल्नेछ ।
