मर्यादा विपरित कार्य गर्ने विद्यार्थीको परीक्षासंगै परीक्षा केन्द्र पनि खारेज हुनसक्ने बोर्डको चेतावनी

काठमाडौँ– भदौ ३० गतेदेखि शुरु भएको कक्षा १२ को वार्षिक परीक्षाको पहिलो दिन नै सामाजिक सञ्जाल फेसबुक र टिकटकमा परीक्षा हलमा नै बसेर उत्तरपुस्तिका, परीक्षा हलमा विद्यार्थीले चिट चोरिरहेकोजस्ता भिडियो सार्वजनिक भएको थियो ।

होम सेन्टरमा नै परीक्षा दिन पाउने व्यवस्थासहित लागू भएको परीक्षामा अधिकांश विद्याार्थीले मर्यादाबाहिरका गतिविधि गरिरहेको प्रस्ट देखिन्छ ।

यसरी उक्त भिडियो बाहिरिएलगत्तै राष्ट्रिय परीक्षा बोर्डले विद्याार्थी मर्यादाविपरित काम गर्ने सबै परीक्षार्थीको परीक्षा रद्द हुन सक्ने चेतावनी दिएको छ ।

बोर्डले एक सुचना जारी गर्दै परीक्षा हलमा मोबाइललगायत अन्य इलेक्ट्रोनिक्स डिभाइस निषेध गरिएको अवस्थामा उत्तरपुस्तिका समेत सामाजिक सञ्जालमा भेटिएको विषयमा गम्भीर ध्यानाकर्षण भएको जनाएको हो  ।

यसैगरि, यस प्रकारका अमर्यादित कार्य नगर्न/नगराउन सम्बन्धित विद्यार्थी, शिक्षक एवं विद्यालयहरुलाई आग्रह गरेको छ ।

यस्तै, परीक्षार्थीले परीक्षा हलमै मोबाइल लगी उत्तरपुस्तिकाको फोटो खिचेर टिकटक बनाएर राख्ने लगायतका गतिविधि परीक्षाको मर्यादा विपरीत रहेकाले त्यस्ता परीक्षार्थीको सम्पूर्ण विषयको परीक्षा रद्दका साथै सम्बन्धित विद्यालयको परीक्षा केन्द्र समेत खारेज गर्न सक्ने बोर्डले जनाएको छ ।