एमालेद्वारा सर्वदलीय बैठक बहिष्कार

काठमाडौं – प्रमुख प्रतिपक्षी दल नेकपा (एमाले)ले प्रधानमन्त्री शेरबहादुर देउवाले बोलाएको सर्वदलीय बैठक बहिष्कार गर्ने भएको छ ।

यसअघि पनि एमालेले लगातार सदन अवरोध गर्दै आइरहेको छ । एमालेले अध्यादेश ल्याएर आफ्नो पार्टी फुटाइदिएकोमा सरकारसँग चित्त दुखाउँदै आएको छ ।

त्यसैगरी एमालेलाई सभामुखले सदनमा गरेको कामकारबाहीमा पनि चित्त दुखाई रहेको छ । सोही कारण एमालेले सर्वदलीय बैठकमा पनि भाग नलिने भएको हो ।

संसदको गतिरोध अत्यबारे छलफल गर्न भन्दै प्रधानमन्त्रीले देउवाले आज बिहीबार बिहान १० बजेका लागि बालुवाटारमा सर्वदलीय बैठक बोलाएका छन् । तर, आफूहरु यो बैठकमा नजाने एमाले संसदीय दलका प्रमुख सचेत विशाल भट्टराईले बताए ।

वर्तमान सरकारले दल विभाजनसम्बन्धी अध्यादेश ल्याएर आफ्नो पार्टी फुटाएको, संसद छलेर अध्यादेश फिर्ता लिएकोलगायतका विषयमा एमालेको असमति रहेकोले बैठकमा नजाने उनले बताए ।