काठमाडौं – नेकपा (एकीकृत समाजवादी) पार्टीका स्थायी समिति सदस्य एवं स्वास्थ्य तथा जनसंख्यामन्त्री विरोध खतिवडाले कम्युनिष्ट आन्दोलनलाई भ्रष्टीकरणबाट जोगाउन आफूहरुले एकीकृत कम्युनिष्ट आन्दोलनलाई पुर्नगठन गरेको बताएका छन् ।
ADVERTISEMENT
मकवानपुर जिल्लाको इन्द्रसरोबर गाँउपालिकामा पार्टीको वृहत् कार्यकर्ता भेलालाई सम्बोधन गर्दै उनले आफूहरु टुटेको र फुटेको नभई एकीकृत कम्युनिष्ट आन्दोलनलाई भ्रष्टीकरणबाट जोगाउन युगको माग अनुसार पुर्नगठन गरिएको बताए ।
ADVERTISEMENT
स्वास्थ्य तथा जनसंख्यामन्त्री समेत रहेका नेता खतिवडाले आफूहरु गफ गर्न सरकारमा नआएको स्पष्ट पारे । उनले भने, ‘हामी गफका लागि आएका होइनौं, विगतको सरकारले गरेको विकृतिलाई हटाउछौं, जुन काम सुरु समेत भइसकेको छ ।’
फाखेलमा भएको अहिलेसम्मकै विशाल र ऐतिहासिक कार्यकर्ता भेलालाई सम्बोधन गर्दै उनले प्रत्येक वडामा आधारभूत स्वास्थ्य चौकी र हरेक पालिकामा एउटा अस्पताल बनाउने र जनतालाई स्वास्थ्यमा सहज रुपमा पहुँच दिने गरी सरकारले योजना बनाइरहेको अवगत गराए ।
‘विगतको सरकारले बजेट, डिपीआर र अस्पताल कहाँ बनाउने भनेर जग्गाकै सुनिश्चीत नहुँदा समेत एकै दिन सबै पालिकामा अस्पताल शिलान्यास भनेर प्रपोगान्डा गरेको थियो, हामीचाँही जहाँ -जहाँबाट यी तीन कुराको सुनिश्चितता सहित आवेदन आँउछ, त्यहाँ तत्काल पैसा पठाएर अस्पताल निर्माण सुरु गर्छौं । ’ नेता खतिवडाले भने ।
कुन्साङ लामाको अध्यक्षतामा भएको कार्यक्रममा नेकपा एकिकृत समाजवादी केन्द्रीय निर्वाचन आयोगका सदस्य रामचन्द्र बल, प्रदेश समिति सदस्य तथा जिल्ला अध्यक्ष श्रीधर पोखरेल, प्रदेश समिति सदस्य गौतमवुद्ध लामा, इन्द्रसरोवर गाँउपालिका अध्यक्ष तथा जिल्ला कमिटीका उपसचिव जीवन लामा, जिल्ला सचिवालय सदस्य तथा स्वास्थ्य मन्त्री खतिवडाका प्रमुख स्वकीय सचिव माधव तिमल्सिना, जिल्ला सचिवालय सदस्य तथा युवा संघका जिल्ला अध्यक्ष किरणमान बल लगायतको आतिथ्यता रहेको थियो ।
भेलाले कुन्साङ लामाको अध्यक्षतामा ६५ सदस्यीय नेकपा (एकिकृत समाजवादी)को गाँउ पालिका स्तरीय कमिटी तथा विष्णु महर्जनको अध्यक्षतामा ५५ सदीयीय युवा संघको पालिका स्तरीय कमिटी गठन गरेको छ ।
