आवश्यकताका आधारमा चुनावी गठबन्धन : प्रवक्ता महत

काठमाडौँ – नेपाली कांग्रेसका प्रवक्ता प्रकाशशरण महतले नेपाली कांग्रेसले आवश्यकताका आधारमा चुनावी गठबन्धन गर्ने बताएका छन् । स्थानीय तहमा कांग्रेसले आवश्यकता महसुस गरेको अवस्थामा मात्रै चुनावमा गठबन्धन गर्न सकिने उनले बताए ।

सल्यानको छत्रेश्वरीको शङ्खमूलमा निर्माण गरिएको नेपालको सबैभन्दा ठूलो शङ्खपार्कको उद्घाटन गर्न सल्यान आइपुगेका महतले कांग्रेस एक्लै चुनाव जित्न सक्ने स्थानमा गठबन्धन आवश्यक नहुने बताए । “चुनावमा जाने भनेको जित्नकै लागि हो, एक्लै जित्न सकिन्छ भने त्यहाँ किन गठबन्धन गर्ने ? स्थानीयस्तरमा गठबन्धन गर्न आवश्यक भएका स्थानीय तहमा मात्र गठबन्धन गर्ने हो”, महतले भने ।

कांग्रेसको आगामी केन्द्रीय कार्यसमितिमा छलफल गरेपछि सबै कुराको टुङ्गो लाग्ने उनको भनाइ थियो । उनले देशको समृद्धिका लागि कांग्रेस आवश्यक भएको भन्दै अब कांग्रेसले बहुमतको सरकार बनाउने गरी घरघरमा पुगेको बताए । “कम्युनिष्टले ५० वर्ष एकलौटी सरकार चलाउछौँ भन्थे तर तीन वर्ष पनि टिक्न सकेनन्, हावादारी कुरा गरेर सत्ता टिकाउन सकिँदैन भनेर थाहा भइहाल्यो नि, अबको जिम्मा कांग्रेसले लिन्छ”, महतले भने।

महतले देशमा अनुदान लिन हुँदैन भनेर विषयलाई विषयान्तर गरेर विवाद सिर्जना गरेको भन्दै एमालेकै पालमा एमसिसी अगाडि बढेको बताए। “नेपालका लागि एमसिसी हितमा छ, यस्ता अनुदान नेपालले धेरै लिएको छ, अनुदान नलिए देश चलाउन ऋण लिनुपर्छ, अहिले केपी ओलीको सरकारको पालामा देशलाई सबैभन्दा बढी ऋण लागेको छ”, महतले भने ।

नेपालमा लागू भएका अन्य अनुदानमा अन्तर्राष्ट्रिय कानून लागेको भन्दै महतले अन्य परियोजनामा विदेशी कामदार आएर काम गरेको प्रशस्त उदाहरण भएको जिकिर गरे । “एमसिसी अनुदान नेपालका हितमा छ, यसमा पनि अन्तर्राष्ट्रिय कानूनअनुसार ठेक्कापट्टा हुन्छ, यी कुरा नेपालमा पहिलेदेखि भइरहेकाले नयाँ होइन तर यसलाई अपव्याख्या गरेर चुनावी नारा बनाउन खोजियो, त्यो कांग्रेसले पूरा हुन दिएन”, प्रवक्ता महतले भने ।