हेटौँडाको स्थानीय बैठक अधुरै छोडेर फर्किए बालेन, भने– ‘गाली नै सुन्ने भए आफ्नै महानगरवासीको सुन्छु’

काठमाडौँ– काठमाडौँ महानगरपालिकाका मेयर बालेन्द्र (बालेन) साह हेटौंडामा आयोजित स्थानीय सरकारको बैठक अधुरै छोडेर सोमबार नै राजधानी फर्किएका छन् । तीन दिने बैठकमा सहभागी हुन आइतबार उपमेयर सुनिता डंगोलसहित हेटौंडा पुगेका उनीहरु एकदिन मात्र बैठकमा सहभागी भएर हिजो बेलुका ५ बजे नै फर्किएका हुन् ।

मेयर साहले यससम्बन्धमा विज्ञप्ति जारी गर्दै स्पष्टिकरण समेत दिएका छन् । जसमा उनले काठमाडौँ र काठमाडौँबासीसँग सम्बन्धित नभएको कार्यक्रममा काठमाडौंबासीलाई गाली गरी समय र ऊर्जा खर्चिएका कारण बैठक छाडेको प्रस्ट पारेका छन् ।

‘मलाई व्यक्तिगत रूपमा आलोचना वा गाली गर्न पाइयो तर काठमाडौं र काठमाडौंबासीसँग सम्बन्धित नै नभएको कार्यक्रममा काठमाडौंलाई गाली गर्न किन समय र ऊर्जा खर्चिने ? मेरो प्रश्न यति हो’, विज्ञप्तिमा उल्लेख छ ।

यस्तै, देशको राजधानी काठमाडौँ बागमती प्रदेशको लागि एउटा पालिका मात्रै रहेपनि यो कसैको जन्मभूमि, कसैको कर्मभूमि समेत रहेको उनले बताएका छन् । उनले थप लेखेका छन्, ‘गाली गरिराख्ने तर मौका पाउँदा पनि केही नगर्ने ठाउँ र कार्यक्रममा बस्ने औचित्य नदेखेर मैले हिजोको कार्यक्रम छोडेको हुँ।’

गाली र आलोचना नै सुन्ने भए आफ्नै महानगरमा आफ्नै महानगरबासीहरूको सुन्ने वा सम्बन्धित व्यक्ति, समूह वा कार्यक्रमहरूमा सुन्ने उनको भनाई छ ।

फर्किए लगत्तै बालेनले फेसबुकमा एक स्टाटस सेयर गर्दै बागमती प्रदेशको कार्यक्रम ‘काठमाडौँ महानगरलाई गाली गर्ने कार्यक्रम’ रहेको भन्दै कटाक्ष समेत गरेका थिए ।