आधिकारिक निकायबाट प्रक्रिया नपुर्‍याउनाले एसपीपी विवादास्पद बन्याे : वर्षमान पुन

काठमाडौं – नेकपा माओवादी केन्द्रका नेता तथा पूर्वअर्थमन्त्री वर्षमान पुनले आधिकारिक निकायले प्रक्रिया नपुर्‍याउँदा एसपीपी विवादास्पद बनेको बताएका छन् ।

मदन भण्डारी फाउण्डेशनद्वारा आयोजित ‘वर्तमान कूटनैतिक अभ्यास र यसका प्रभाव’ विषयक अन्तरसंवादमा पुनले यस्तो धारणा व्यक्त गरेका हुन् । उनले एसपीपीबारे पहिला केही जानकारी नपाएकोसमेत बताए ।

‘एसपीपीका सन्दर्भमा मैले पनि बाहिर आइसकेपश्चात मात्र जानकारी पाएको हुँ, घटनाक्रम बुझ्दा आधिकारिक निकायबाट प्रक्रिया नपुराएकै देखिन्छ । परराष्ट्र मन्त्रालयबाट गर्नुपर्ने कामलाई जङ्गी अड्डाबाट रक्षा मन्त्रालयलाई चिठी पठाउनु, रक्षा मन्त्रालयले हाम्रो पनि एउटा प्रतिनिधि राख्नू भन्ने किसिमको जवाफले हाम्रो कमजोरीलाई देखाएको छ’, उनले भने ।

नेता पुनले राजनैतिक संक्रमण तथा प्राकृतिक विपद्को समयको बेला पारेर एसपीपीलाई अगाडि बढाउन खोजिएको पनि आशंका व्यक्त गरे ।