कोप-२८ मा सहभागी भएर स्वदेश फर्किए प्रधानमन्त्री प्रचण्ड

काठमाडौँ – प्रधानमन्त्री पुष्पकमल दाहाल ‘प्रचण्ड’ संयुक्त राष्ट्रसंघको जलवायु परिवर्तनसम्बन्धी पक्ष राष्ट्रहरुको २८औं सम्मेलन (कोप–२८)मा सहभागी भई स्वदेश फिर्ता भएका छन् । मंसिर १३ देखि (बुधबार) युएई प्रस्थान गरेको प्रधानमन्त्री प्रचण्ड आइतबार स्वदेश फर्किएका हन् ।

प्रधानमन्त्रीको स्वागतका निम्ति त्रिभुवन अन्तरराष्ट्रिय विमानस्थलको अति विशिष्ट कक्षमा सभामुख देवराज घिमिरे, उपप्रधानमन्त्री तथा रक्षामन्त्री पूर्णबहादुर खड्का, उपप्रधानमन्त्री तथा गृहमन्त्री नारायणकाजी श्रेष्ठ, परराष्ट्रमन्त्री नारायणप्रकाश साउद, मन्त्रिपरिषद्का सदस्य, सांसद, निजामती तथा जङ्गी सेवाका वरिष्ठ अधिकारी, यहाँस्थित युएईको राजदूतावासका उच्च अधिकारी उपस्थित थिए ।

यही मङ्सिर १४ गतेदेखि कोप–२८ दुबइमा सुरु भएको हो । प्रधानमन्त्री दाहाल मङ्सिर १५ र १६ गते ‘विश्व जलवायु शिखर सम्मेलन’को उच्चस्तरीय सत्रमा सहभागी भएका थिए । साथै उनले मङ्सिर १६ गते शनिबार उक्त सम्मेलनलाई सम्बोधन गरेका थिए ।

प्रधानमन्त्री दाहाल युएईको ५२औँ एकता दिवसका अवसरमा युएईले आयोजना गरेको समारोहका साथै ‘जायेद सस्टेनेबिलिटी प्राइज अवार्ड’ समारोहमा पनि सहभागी भएका थिए । उनले मङ्सिर १६ गते जलवायु परिवर्तनका प्रभावबारे नेपालको आवाज उठाउनाका साथै कोप वार्ता प्रक्रियामा पर्वतीय मुलुकका ‘एजेन्डा’ लाई प्रवद्र्धन गर्न ‘हिमालयको आह्वान : जलवायु सङ्कटबाट हामीलाई कसले जोगाउँछ ?’ शीर्षकमा उच्चस्तरीय छलफल आयोजना गरेका थिए ।

काठमाडौँ, १७ मङ्सिर :
प्रधानमन्त्री पुष्पकमल दाहाल “प्रचण्ड” जलवायु परिवर्तन सम्बन्धी पक्ष राष्ट्रहरुको २८औँ सम्मेलन(कोप–२८)मा सहभागी भई स्वदेश फर्कनु हुँदै । तस्बिर : रत्न श्रेष्ठ/रासस

प्रधानमन्त्री दाहालले उच्चस्तरीय सम्मेलनमा सहभागी हुने सिलसिलामा दुबइमा एकत्रित भएका विभिन्न मुलुकका राष्ट्र/सरकार प्रमुखका साथै अन्य उच्चपदस्थ व्यक्तित्वसँग बेग्लाबेग्लै द्विपक्षीय भेटवार्ता गरेका थिए । उनले संयुक्त राष्ट्र सङ्घका महासचिव एन्टियो गुटेरेस, भारतका प्रधानमन्त्री नरेन्द्र मोदी, क्युबाका राष्ट्रपतिलगायत विश्व नेतासँग बेग्लाबेग्लै भेटवार्ता गरेका थिए ।

उक्त भेटमा मोदीले नेपालको पश्चिम क्षेत्रमा गएको भूकम्पबारे चासो राख्दै भूकम्प पीडितलाई आवश्यक सहयोग गर्न तयार रहेको बताएको प्रधानमन्त्री प्रचण्डले बताए ।

युएईमा रहँदा प्रधानमन्त्रीले अवुधाबीस्थित नेपाली राजदूतावासको भ्रमण गरेर त्यहाँ नेपाली समुदायसँग छलफल गरे भने नेपाल–युएई व्यापार शिखर सम्मेलनलाई सम्बोधन गर्दै नेपालमा लगानीका लागि आह्वान गरेका थिए र

१६ गते नेपालले आयोजना गरेको हाई लेभल राउण्ड टेबलमा अध्यक्षता ग्रहण गरेका थिए । सोही दिन उनले कोप–२८ मा नेपालको तर्फबाट सम्बोधन गरेका थिए । आज बेलायतका विदेशमन्त्री एन्ड्रु मिचेलले प्रधानमन्त्री प्रचण्डसँग भेट गरेका थिए ।