खेल नीतिलाई परिमार्जन गर्ने तयारी भइरहेको छ : खेलकुदमन्त्री श्रेष्ठ

काठमाडौँ – युवा तथा खेलकुद मन्त्री विराजभक्त श्रेष्ठले  खेल नीतिलाई परिमार्जन गर्ने तयारी भइरहेको बताएका छन् ।

शुक्रबार ललितपुरमा नेपाल ओलम्पिक कमिटीले आयोजना गरेको बधाई एवं शुभकामना कार्यक्रममा मन्त्री श्रेष्ठले खेल नीतिमा देखिएका त्रुटी हटाउँदै समयसापेक्ष बनाउन परिमार्जन गर्ने तयारी भइरहेको बताएका हुन् ।

उनले खेलसंग सम्बन्धीत सरोकारवाला निकायसँगको छलफलका आधारमा त्यसलाई परिमार्जन गर्ने जिकिर गरे । उनले व्यक्ति केन्द्रीत नभई नीति केन्द्रीत खेल क्षेत्र हुनुपर्नेमा जोड दिए ।

मन्त्री श्रेष्ठले योगदानका आधारमा नभई खेलकुद क्षेत्रमा राजनीतिक आधारमा नियुक्त हुने गरेकाले बेतिथी देखिएको उनले बताए । त्यस्तै उनले खेलकुदमा योगदान गरेका व्यक्तिहरुलाई विभिन्न निकायमा नियुक्त गर्न सके खेल क्षेत्रको विकास हुने बताए ।