एनआईसी एशियाको उदारता : चैत्रभित्र भुक्तान गरे कर्जा ग्राहक पाउनेछन् यस्ता छुट

काठमाडौँ – ‘बैंक पनि साथी पनि, राम्रो पनि हाम्रो पनि’ भन्ने मूल नाराका साथ उत्तरदायी बैंकिङ्गको अभ्यास गर्दै आइरहेको एनआईसी एशिया बैंकले कर्जा ग्राहकलाई प्रदान गरिने छुटसम्बन्धी योजना सार्वजनिक गरेको छ ।

बैँकले देशमा हाल कायम रहेको आर्थिक शिथिलताका कारण बैंकको कर्जा ग्राहकहरुमा परेको असरलाई न्यूनीकरण गर्न सघाउ पुर्याउने हेतुले उक्त योजना सार्वजनिक गरेको हो ।

उक्त छुट योजना अनुसार पौष महिनामा निष्क्रिय कर्जाको रुपमा वर्गीकरण भएका कर्जाहरुको हकमा ऋणीले आफ्नो चैत्र मसान्तसम्मको ब्याज तथा किस्तासहित सम्पूर्ण कर्जा रकम नै पूर्ण रुपमा भुक्तान गरेमा चैत्र मसान्तसम्म लाग्ने जरिवाना तथा हर्जाना रकममा शत प्रतिशत छुट पाइनेछ । यस्तै ब्याज रकममा समेत विशेष छुट पाइने बैँकले जनाएको छ ।

बैँकका अनुसार कमसल वर्गको कर्जाको ब्याज रकममा १० प्रतिशत छुट पाइने छ । यस्तै शंकास्पद वर्गको कर्जाको ब्याज रकममा १५ प्रतिशत र खराब कर्जाको ब्याज रकममा २० प्रतिशत छुट पाइने बैँकले जानकारी दिएको छ ।

मासिक तथा त्रयमासिक किस्ताबन्दीमा भुक्तानी हुने वा चालूपुँजी कर्जा तथा अन्य रिभल्विङ प्रकृतिका कर्जाहरू लगायत बैंकबाट प्रवाह भएका कुनै पनि प्रकारका कर्जाहरूमा आर्थिक शिथिलताका कारणले मर्कामा परेका ग्राहकले यस योजनामा सहभागी भई लाभ लिन सक्नेछन् ।

यस असाधारण समयमा राष्ट्रिय अर्थतन्त्रको बृहत्तर हितको निमित्त सबै सरोकारवालाहरूले आ–आफ्नो हिसाबले योगदान पुर्याउनुपर्ने आजको टड्कारो आवश्यकतालाई हरसम्भव सम्बोधन गर्न बैंकले ऋणीहरूका लागि कर्जामा आकर्षक ब्याज छुटको व्यवस्था गरेको हो ।

बैंकले ल्याएको यस छुट योजनाबाट आर्थिक शिथिलताले समस्यामा परेका ग्राहकको वित्तीय भार कम गर्न केही हदसम्म भए पनि मद्दत पुग्नुका साथै देशको समग्र अर्थतन्त्रको पुर्नउत्थान एवम् दीगो सबलीकरणमा समेत टेवा पुग्ने बैंकले विश्वास व्यक्त गरेको छ ।

एनआईसी एशिया बैंकले मुलुकभर ३६० शाखा कार्यालयहरू, ६७० एटीएम, ११७ वटा विस्तारित काउन्टर एवं ५१ वटा शाखा रहित शाखा सञ्जाल विस्तार गरेको छ ।

देशको अर्थतन्त्रको सवलीकरण तथा उच्च आर्थिक वृद्धिमा टेवा पुर्याउन उत्तरदायी बैंकिङ्गको अभ्यास गर्दै स्थापनाकालदेखि हालसम्ममा प्रत्यक्ष र अप्रत्यक्ष गरी कुल रू. २३ अर्ब ७ करोड भन्दा बढी राजश्व नेपाल सरकारलाई भुक्तानी गरेको र गत आर्थिक वर्षमा रू.३ अर्ब ६१ करोड भन्दा बढी राजश्व नेपाल सरकारलाई बुझाउन बैंक सफल भएको छ ।

बैँकले देशको कुल जनसंख्याको ८० प्रतिशतभन्दा बढी बसोबास गर्ने ग्रामीण तथा साना सहरी क्षेत्रमा बैंकले आफ्ना ७२ प्रतिशत शाखा कार्यालयहरू स्थापना गरेको छ ।