रवि पक्राउ सन्दर्भमा रास्वपा नेता श्रेष्ठ भन्छन् – ‘हामी फेस गर्न तयार छौँ, सरकार भने जोखाना हेराइरहेको छ’

काठमाडौँ– राष्ट्रिय स्वतन्त्र पार्टीका नेता विराजभक्त श्रेष्ठले सरकारले रास्वपा सभापति रवि लामिछानेलाई पक्राउ गर्ने सन्दर्भमा आफूहरु फेस गर्न तयरा रहेको बताएका छन् ।

शुक्रवार माओवादीका अध्यक्ष पुष्पकमल दाहाल ‘प्रचण्ड’ ले डाकेको प्रमुख प्रतिपक्षी बैठकबाट निस्कदै उनले पत्रकारहरु समक्ष सो राय पोखेका हुन् । निस्पक्ष अनुसन्धानलाई सघाउन सभापति लामिछाने तयार भए पनि पूर्वाग्रही व्यवाहार स्वीकार्य नहुने उनको भनाई छ ।

‘सभापति विधिवत् हिसाबमा त्यो कुरामा छानबिन गर्न त तयार नै हुनुहुन्छ । राज्यको दूरुपउयोग गरेर प्रशासनलाई दबाब दिएर नहोस् भन्ने कुरामा स्पष्ट नै हो’, उनले भने ।

निष्पक्ष अनुसन्धानमा सहयोग गर्न तयार छु भनेर रविले नै अभिव्यक्ति दिइसकेको भन्दै उनले थपे, ‘उहाँहरू चाहीँ कतिखेर समात्दा ठीक हुन्छ भनेर बाजे देखाउन गएको जस्तो लागेको छ मलाई । उहाँहरुको ग्रहदशा हेर्ने पनि बानी छ । यस्तैयस्तै टाइम पार्ने हो उहाँहरूले । हामी फेस गर्न तयार छौं ।’