काठमाडौं– प्रधानमन्त्री केपी ओलीले मुलुकमा राजनीतिक स्थायित्व कायम गर्न सबै पक्षको सहयोग जरुरी रहेको बताएका छन् । आज राजधानीमा निर्वाचन आयोगद्वारा आयोजित दोश्रो निर्वाचन दिवसको कार्यक्रमलाई सम्बोधन गर्दै उनले सो कुरा बताएका हुन् ।
कार्यक्रमममा बोल्दै प्रधानमन्त्री ओलीले नेपाली जनताको ठूलो बलिदान र संघर्षबाट प्राप्त लोकतन्त्रको जगेर्ना गर्न लोकतान्त्रिक गणतन्त्रको जग सुदृढ बन्दै जान्पर्नेमा जोड दिए । निर्वाचन आयोगले गरेका कामहरुको प्रशंसा गर्दै उनले भने,जनतामा निहित सार्वभौमसत्ताको सुदृढीकरण,लोकतन्त्रको संस्थागत विकास र जनभावना अनुकल शासन व्यवस्था सञ्चालनका लागि निर्वाचन नै मेरुदण्डको रुपमा रहेकोलेआगामी दिनमा स्वच्छ, स्वतन्त्र र विश्वसनीय निर्वाचन सम्पन्न गर्न आयोगको गहन भूमिका रहने हुनाले यस्तो समारोहको गरिमा र आवश्यकता अझ बढेको छ।
उनले यसै वर्ष सम्पन्न निर्वाचनलाई सफलतापूर्वक सम्पन्न गर्ने नेपाल सरकार, निर्वाचन आयोग, राजनीतिक दल, राष्ट्रसेवक, सुरक्षा निकाय, निर्वाचन पर्यवेक्षण निकाय तथा आमसञ्चार जगत सबै धन्यवाद् समेत दिए । प्रधानमन्त्री ओलीले नेपालको संविधान २०७२ जारी भएपछि निर्वाचन आयोगको भूमिका र दायरा अझ बढी व्यापक हुन पुगेको समेत बताए ।