पुनः लोडसेडिङ हुने कुरालाई नकार्दै हितेन्द्रले भने : ‘हावाहुरीका कारण विद्युत् आपूर्तिमा अवरोध देखियो’

काठमाडौँ– नेपाल विद्युत प्राधिकरणका कार्यकारी निर्देशक हितेन्द्रदेव शाक्यले प्राविधिक समस्याका कारण विद्युत् आपूर्तिमा अवरोध देखिएको बताएका छन् ।

शुक्रबार प्राधिकरणको स्युचाटार कार्यालयमा पत्रकार सम्मेलन गर्दै शाक्यले हावाहुरीका कारण प्रशारण लाइनमा समस्या आउदा विद्युत् आपूर्तिमा अवरोध देखिएको बताएका हुन् ।

उनले बिहीबार बेलुकी ढल्केवर–मुजफ्फरपुर ४०० के.भी. डबल सर्किट लाइनमा हावाहुरीका कारण समस्या देखिएकाले काठमाडौं लगाएतका केहि स्थानमा विद्युत् आपूर्ति हुन नसेकेको स्पष्ट पारे ।

भारतबाट सो लाइनमार्फत नेपालमा भइरहेको विद्युत् आयात समेत केहि समय रोकिएका कारण बति जाने समस्या आएकाले जनमानसमा लोडसेडिङको भ्रम सिर्जना भएको उनले जनाए । प्राधिकरणले नेपालमा पुनः लोडसेडिङ सुरु हुने सम्भावना पूर्ण रुपमा अस्वीकार गरेको छ ।

कार्यकारी निर्देशक शाक्यले प्राविधिक समस्याहरूलाई दीर्घकालीन रूपमा समाधान गरिने भन्दै यसका लागि केहि समय लाग्ने उल्लेख गरे । उनले अहिले करिव १४ सय मेगावाट विद्युत् उत्पादन र पिक आवरमा २ हजार मेगावाट माग रहको जानकारी दिए । प्रसारण लाइनको विद्युत् भारवहन गर्ने क्षमता लोड धान्न सक्ने अवस्था नरहेकाले पनि समय समयमा बति जाने गरेको उनले जनाए ।

उनले आफु स्वयं प्रणाली नियन्त्रणमा बसेर हेर्दा प्रसारण लाइनको विद्युत् भारवहन गर्ने क्षमता सिमामा पुगेको देखिएको उल्लेख गरे । जसका कारण उपत्यकाको माग धान्न अन्य क्षेत्रबाट आएको विधुतलाई चार्ज गर्न खोज्दा लाइन ट्रिप हुने गरेको उनको भनाई छ ।