६ महिनादेखि फलामको खोरमा शिवराम

काठमाडौं– चितवनका एक युवा उपचार नपाएपछि आफ्नै घरभित्र फलामको खोरमा बस्न विवश भएका छन ।

पूर्वी चितवनको खैरहनी नगरपालिका वडा नम्बर १ स्थित गणेश चोकका शिवराम भुसाल उपचारको अभावमा आफ्नै घर भित्र फलामको खोरमा बस्न बाध्य भएका हुन ।

२९ वर्षीय शिवरामको उपचार नभएपछि ६ महिनायता फलामको खोरमा राख्नुपर्ने अवस्था आएको आमा जया भुसालले जानकारी दिइन् । जन्मजातनै सुस्त मनस्थिति भएका उनको मानसिक सन्तुलन समेत ठिक नभएपछि ६ महिना अघिबाट खोरमा राखेर हेरचाह गर्न परिवार बाध्य भएको हो ।

त्यसअघि उनलाई घरको खाटमा डोरीले बाँधेर राख्ने गरिएको आमा जयाले जानकारी दिइन् । उनलाई अहिले घर बाहिरको काममा जाने बेला फलामको खोरमा थुन्नुपर्ने अवस्था छ । घरमै बसेका बेला भने खुला रुपमै छोडने गरिएको पनि परिवारले जनाएको छ ।

शिवराममा कुनै पनि कुराको होस हुँदैन । दिसापिसाव आएको पत्ता नहुने र सरिरमा लगाइएको कपडा पनि च्यातेर फाल्ने भएकाले उनलाई हेरचाह गर्न परिवारलाई सकस भएको छ । सानैमा निमोनिया आएकाले छोराको यस्तो हाल भएको आमा जयाको बुझाई छ ।

शिवरामलाई एक्लै छोडने अवस्था नरहेको पनि परिवारले जनाएको छ । घरमा शिवरामको बुवा, आमामात्रै रहेका छन् ।
बुबा विद्यालयमा पढाउन गएपछि आमा जयाले शिवरामलाई फलामको खोरमा राखेर घरको काम गर्नुपर्ने बाध्यता छ । शिवरामलाई उचित उपचारको व्यवस्था गरिदिन सरकार र संघ, संस्थाहरुसँग परिवारले आग्रह गरेको छ ।

राम्रो औषधि उपचारको व्यवस्था भए शिवराम निको हुने आम जयाले विश्वास व्यक्त गरिन । अहिले शिवरामलाई दिउँसो फलामको खोरमा राख्ने र बेलुका घर भित्र लगेर सुताउने गरिएको छ ।